意球評家Achilles畀料 烏甸些路迪捱細界

猪拉多纳

29/09/2011
文： 黑柴

又到歐霸盃場合，今次黑柴請嚟意大利球評家Achilles，同大家研究些路迪主場對烏甸尼斯嘅比賽，Achilles係AC米蘭擁躉，佢認為今季意甲AC嘅主要爭霸對手並唔係國際米蘭，而係烏甸，不過呢班波對歐霸盃興趣唔大，今場只係半力出擊，尤其鋒線更加會收起晒啲主力，作客面對攻力同樣有限嘅些路迪，建議捧1.65倍入球細。




（有線63及203台周五凌晨1時直播）


烏甸得個o靚仔打單箭頭


Achilles指出，烏甸尼斯今季雖然放走多名主力，不過教練古杜連的確有料到，球隊嘅整體演出未見走樣，不過古杜連自知兵源有限，目前已將注意力集中喺意甲，歐霸盃會大量起用副選，球隊啱啱喺周日聯賽作客賽和卡利亞里，嗰場波喺酷熱天氣下進行，球員搏得好辛苦，今場會畀啲主力休息，其中隊長兼首席射手迪拿達利更索性掛免戰牌，留喺意大利唔使出征。




烏甸陣中只配置四名前鋒，除迪拿達利外，另外兩名箭頭保羅巴列圖同科路科利斯都因傷缺陣，今仗前線得番只喺意甲上陣過廿七分鐘嘅廿一歲小將迪亞高法比尼打單箭頭，攻力大為削弱。此外，助攻力強嘅哥倫比亞守將保羅艾美路亦因為疲勞休息，羅馬尼亞中場加比爾托治因為唔符合歐戰資格缺陣，陣容實在天殘地缺。




不過，Achilles都唔敢反烏甸，皆因些路迪亦唔好得幾多，由於較早前蘇超大戰作客輸咗畀格拉斯哥流浪，目前已經落後流浪七分，自然更重視嚟緊周日作客對赫斯嘅聯賽大戰。事實上，近年蘇格蘭聯賽水平嚴重下滑，些路迪同流浪喺歐戰成績慘不忍睹，些路迪今季三場歐霸盃賽事，只曾對瑞士球隊錫永入過一球，攻力疲弱，今場捧「細」好過。