洪禮賢講馬：不問究竟 跑完覺醒

猪拉多纳

　　一代星中之星陳百強先生，有首金曲《不再問究竟》，諗諗吓，有時喺馬場，亦要抱類似心態，話就話事出必有因，可惜，到頭來，可能跑完嘞，先知點解落飛，啊！原來「聰明錢」計得準，插得應囉。周中8場谷戰唔係冇冷嘢，頭場已經整隻30幾倍冷W「金得意」，而大部分場次Q派幾嚿，頭尾場更過千蚊，本來風風雨雨之下作賽唔爆就有鬼，不過，冷門爆得嚟，其實好多原本冇乜飛嘅馬，臨開賽前賠率瞬間轉移（財富），如果買咗嗰批冷變熱嘅馬友，個個會呻：「打劫呀！」

　　坦白講，自由市場，冇得話打唔打劫，洪某一向都係咁講，大家1場都係對住咁多匹馬，唔會好似打麻雀咁，我打13隻，你可以打16隻！總之12匹馬，賽前點幻想、假設、計算、畫圖、睇操，唔會離得開嗰12匹馬，「聰明錢」有計得啱之時，如「帝豪名駒」、「高風格」，臨尾掟大鎚嘅力度唔係細，獨贏、位置、鴛鴦Q，中到啪啪聲。然而，「勝利駿駒」喺最後階段，關於佢嘅賠率跌幅亦大，在場馬迷個個嘩嘩嘩，最後咪尾二返嚟。

　　所以，唔使問點解會畀人打劫，假如閣下係買咗當晚第六場「競駿寶寶」，可能多謝都嚟唔切，因為「勝利駿駒」飛數勁跌，搞搞吓令原是大熱嘅前駒有近6倍W，而Q差唔多有兩嚿水。