洪禮賢講馬:雪米糍好好機會多利皇百事凰 國寶醒目精英曬冷王開心老友

猪拉多纳

　　今期賽事，最大變數係賽事途中有冇雨落，事關場地淋唔淋，對唔少今日熱門有着幾大影響性。
　　至於馬房方面，賽前毫無疑問三大倉口東、蔡、摩比較受注目，其中蔡廐兵力真係好密集。

重心場次：第四場 第四班（60-40分）1400米

　　「雪米糍」上賽前工夫已經好壓迫，態度擺明有心即搏，跑落亦符合預期。而跑完仍肯落力磨，睇手法未贏前未必會收手；慢地性能未明，但如正常場地，步速又唔係特慢，直路佢可盡情表演。

　　「多利皇」及「好好機會」，一對馬剛同場，齊齊入三甲，按末段兩駒表現，大有加程必要，好在今仗檔好易發揮。

　　「百事凰」閹完後喺走規和脾性方面有改善，而除罩亦係正面訊息，雖然進度或未夠，由於太冷，之前試閘又唔係冇走勢，建議先博一注。「金鑛龍華」回到此程，應該係分手前最後一次捧場。

　　「卡加大師」泥閘全程伏喺內欄，好輕鬆喺前面返嚟，印象幾好。「電訊超星」如他日排內檔，便要小心，外檔則驚又似上場，轉親彎都唔順。

第一場 第五班（40-10分）1400米

　　「雄心馬主」返回此程比1600米好多多聲，而地慢對佢發揮冇問題，成績應會比上賽進步。「陽光王子」係擔心全程被迫喺外叠，睇暑後狀態和早前試閘，唔係冇好感。

　　「金剛驃」大閘1次比1次出色。「愛蓮說」與「放縱」，好大機會齊齊搶，能力則以前駒較可取。

　　「福至心靈」初出跑得冇預期咁好，但臨場情緒係有好轉，不妨跟多場。

第二場 第四班（60-40分）1600米

　　「馬主精英」上季尾至今季初，一再喺賽事中湧一段，尤以上賽幾吸引，如重上軌道，目前分數太筍。「傑出君子」為求熱身，賽前工夫唔係多，跑得曳咪驚，賽後程序肯配合，今仗或有大幅進步。

　　「進攻足球」由始至終都係講嗰句，隻馬係有狀態，但重磅令佢喺四班冇大優勢。「正榮」希望跑完1場，加上今日場地偏慢，會幫到佢提升威力。「福到財星」與「京城三寶」上賽又唔係全無表現，成冷可拖。

第三場 第四班（60-40分）1200米

　　「樂融融」初出已揀，表現討好，希望加頭罩唔會有反效果。「超綵」剛賽前較前有分別之處係身壯，但估唔到谷草短直路亦可衝入P，表現出比轉馬房前能力大咗幾多，而轉場應會好。

　　「好中煌」初出負133磅，多少有壓力，跑質。「王者先鋒」跑到冇P，上賽演出跌眼鏡，但可能今場劣檔焗留得後，有唔同發揮。「喜寶龍威」唔信跑完1場對性情有好大改善，不過，剛仗亂晒龍仍差啲入到圍，好唔簡單。「風火飛駒」如換人後，取位冇上賽咁蝕，有望上名。

第五場 第三班（80-60分）1000米

　　「危險大軍」以初出贏馬時間及距離，上班完全唔擔心，只係場地問題而已。「喜盈門」夠快排14檔，跑線夾跑法，韋達唔騎亦唔介意。

　　「御鋒」靠一啖氣，睇吓又放到邊度。「黃金年代」又一次排內檔，希望克服到。「星運俊爵」喺三班如跑田草，級數只值中下，好在跑法和路程可靠。「尚駿心」或因場地削弱留後衝威力。

第六場 第一班（105-80分）1600米

　　「國寶」及「醒目精英」，俱為往績好準一族，不過，前駒一下子孭太重磅，後駒初上一班及地慢，可能存在變數。

　　「戶外名駒」場地乾快的話，必須重視。「曬冷王」實力不比前駒失色，係「恰」初出可能未夠氣量。「開心老友」剛敗或因未熱身，所以，跟好位而末段冇得衝，唔使睇得咁大件事，今仗如地慢，佢嘅跑法及路程經驗會賺。

第七場 三級賽（95分及以上）1000米

　　「蓮華生輝」除非場地冇得追，若非不利，始終係馬王級，縮落直路亦比1200米有把握。「金德寶」速度高又唔怕淋地，講到跑法就更着數。

　　「小橋流水」情況與前駒相似，更何況，此程4場未輸過。「XX繽紛」明星中嘅明星，只係考慮復出跑到幾多成水準。

第八場 三級賽（100分及以上）1400米

　　「雄心威龍」與「締造美麗」，卡士高，又唔怕負重，但初出路短及外檔係事實，睇吓有幾多影響。

　　摩廐一對「軍事攻略」與「新力勁」，近況可能後駒好啲。「勁飛寶」大閘嫌拉士主動性不夠，尊重往績至揀。「一言為定」備戰足，係輸級數。「勝眼光」如打水戰，最有機會大幅提升能力。

第九場 第三班（80-60分）1400米

　　「豐衣足食」1400米演出向來有保證，變化地對發揮亦不會構成問題。「新希望」三班有利，此程及近況則有疑問。

　　「精彩生輝」剛賽明顯係騎師唔夠硬淨，先會一再被夾，實際走勢唔錯。「進勝福星」評分摸頂，但若利前領及慢地，或可威脅。「氣定神閒」如果搵啱跑法，回到三班仍然夠爭。「八逢九紫」要視乎前兩駒早段如何演繹，且看6檔楔得好唔好。

第十場 第三班（85-60分）1800米

　　「幸運勁」剛仗發揮一絕都輸，希望係路程問題，加程200米則有利。「旺國手」三班賽經常係三甲常客，此程亦遠比1400米啱追。

　　「愜意小開」如非一招了，好戲陸續有來。「智多飛」計馬在三班負輕磅好着數，但初出跑長途，賽前冇大閘，只得兩細閘，希望練氣練得夠。「印度光輝」往績要先熱身，不過場地如帶黏，開正佢嗰瓣。「歡欣滿載」泥閘追勢好銳利，只係配搭問題要考慮。