科隆當弗反客為主

猪拉多纳

01/10/2011
文： Wendy

周中小妹要做辛尼特對波圖場歐聯直播，効力辛尼特嘅葡萄牙中場丹尼有波入。入波唔出奇，但奇就奇在佢嘅慶祝方式非常爆笑——竟然係扮狗仔喺草地度爬，爬咗幾步仲要曳起一隻腳學狗仔小便，正面睇，可以話佢好愛護動物，但老實講，真係幾不雅！




不過呢種慶祝方式，我做咁多年直播都未見過。其實球員入波後無出位嘅慶祝方式唔緊要，對班主同球迷嚟講，最緊要多波入，咁德甲就通常都做得到。今晚我會做兩場德甲直播，尾場哈化柏林主場對科隆，「科隆王子」普多斯基近期腳風超順，理應可帶領球隊輕勝人腳不整嘅哈化。（有線61及64台周日凌晨零時30分直播）




原本出晒名係地頭蟲嘅科隆，今年情況有變，三場作客已有兩勝，上星期睇佢哋贏賀芬咸亦非常有說服力。除咗前線上嘅「王子」同路華高域，仲要特別留意波蘭左中場柏斯高，佢嘅左路攻擊帶來好多威脅。呢場波雖然後防會冇咗碧高同柏度基洛美，但由其他人去頂替都OK，近期兩連勝亦見態勇。況且主隊冇咩攻力，呢場要守得穩冇難度。


哈化兩主力停賽打擊大


上星期哈化作客以1:2輸畀雲達不來梅，最慘仲要打少兩個，右閘利爾同前鋒阿祖安拉莫斯今場都要停賽，今晚雖有主場之利，但人腳極為不整。其實球隊由德乙升番上嚟後，都好似仲未跟到德甲嘅節奏，呢場仲要讓到咁狠，大家要小心啊。


有線球彩台主持 Wendy


熱愛舞蹈的Wendy，04年歐國盃Euro Babe變身成為有線球彩台節目主持，當初對足球猶如混沌初開，依家已滾瓜爛熟，最愛暢談波經。




Wendy推介：

科隆 讓球客勝

phone波熱線：1831 678

電郵：soccer64@cabletv.com.hk

開放時間：「超級星期六」晚上9:00至深夜2:30