愛華頓爛仔揪爆紅軍

猪拉多纳

01/10/2011
文： 阿占

英超每季嘅其中一大焦點：默西塞德郡打吡爆發！愛華頓今晚會喺主場迎戰利物浦，主隊受讓抵捧！如果單睇兩隊夏天組軍嘅情況，利物浦係好好多，不過莫耶斯領軍嘅愛華頓韌力十足，一班爛仔工兵中場攻守兼備，撞啱紅軍條防線咁多甩漏，謝拉特又未必踢正選，「拖肥糖」有力保不敗，阿占撐1.54倍「讓球主勝」。（有線200及300、廣東體育周六晚7:45直播）




利物浦頭幾場波喺班新兵刺激下，表現的確唔錯。不過踢踢吓就見晒底，中場自魯爾梅利斯轉「車」後，紅軍焗用主攻嘅查理阿當同質素麻麻嘅盧卡斯踢中場中，效率明顯大幅下降，第一道屏障唔掂，條防線當然吃力啦！


謝拉特未必踢正選


最慘係右後衞格連莊臣同中路守將丹尼爾艾格養傷，惟有靠新人馬田基利同老將加歷查支撐大局，梗係輸到甩轆啦！對上兩場作客分別不敵熱刺同史篤城，就係最好嘅證據！




係，養傷一排嘅紅軍大佬謝拉特已正式復出，不過今鋪會唔會踢正選，仲係未知之數。況且小弟覺得以「謝四」依家嘅狀態，未必好得過表現對辦嘅佐敦軒達臣，喺呢場飛沙劈石嘅打吡戰夾硬上陣，分分鐘會累死呢位神奇隊長。咪忘記前鋒安祖卡路爾狀態低沉，係人都知盯死蘇亞雷斯，就等於封殺晒利物浦嘅進攻能力啦！


上季對賽拖肥1勝1和


相比起利物浦，冇咗阿迪達、耶高保同碧福特嘅愛華頓，喺限米煮限飯嘅環境底下，又煮得幾好味喎！「拖肥糖」喺上周輸畀曼城前，就錄得5場不敗，當中最大功臣肯定係班打仔！由隊長菲臘尼維利、費蘭尼、奧斯文同魯迪維爾等硬漢組成嘅爛仔中場線，夠晒硬淨之餘仲有一定進攻能力，加上上仗受傷嘅卡希爾，今晚可以同射手沙夏一齊復出，陣容更完整，睇埋愛華頓上季兩戰利物浦係一勝一和，今晚主場出擊要保不敗之身，一啲都唔難吖！


横數千軍


愛華頓連開4口雙

‧近8戰3勝3和2負，連續4場開入球雙。

‧近6次主場對利物浦得2勝1和3負，對上4次都係開細。

紅軍蘇亞雷斯旺首球

‧近8戰5勝1和2負，對上6場5次開大。

‧蘇亞雷斯今季4個入球全為首名入球。

頂占筍盤：愛華頓（讓球主勝）

有線球彩台主持阿占

電郵：soccer64@cabletv.com.hk

PHONE波熱線：1831 678

「超級星期六」開放時間：周六晚9:00至周日凌晨2:30

賽果熱線：2707 9900‧周六晚6時20分起至周日晚6時止