車仔踩油撞瓜保頓

猪拉多纳

02/10/2011
文： 力奇

周中喺歐聯臨尾香失分嘅車路士，今晚返嚟英超作客魚腩保頓，梗係洩憤好時機，事關車仔今仗有「好消息」，「黑仔射手」費蘭度托利斯停賽由杜奧巴擔正，仲點會肯留手？梗係捧2.18倍「讓球客勝」啦！（有線200、300及廣東體育周日晚8:30直播）


近8次作客對賽入18球


雖然話費托狀態有多少回勇，但要靠佢獨力領軍贏波，始終好難令人放心。由於佢上仗領紅被逐，今仗開始要坐3場波監，前鋒線個位就會由傷愈嘅杜奧巴補上，加埋喺歐聯重拾正選兼入波嘅林柏特同西班牙中場桑馬達，鬥志、默契同經驗俱佳，今鋪仲唔搵保頓祭旗咩？




保頓呢邊，主帥奧雲高尼以前讀教練班係保亞斯同學，都對後者讚不絕口，話佢係天生王者，求勝欲超強。至於話想阻止保亞斯得勝，奧雲高尼睇怕都係有心無力，事關保頓已經係連續5場聯賽輸波，狀態衰到貼地。更大鑊嘅係，佢哋今仗有中堅韋達同前鋒卡斯歷停賽，中場賀頓又同李青龍齊齊長抖，借將卡古達今場又唔准落場，殘陣出擊之餘，保頓近15次對車仔只得2和13負劣績，近6次交手全輸，近8次主場「鍊車」亦係失咗18球未入1球，撞正剋星，搵乜同人砌呀？