洪禮賢講馬：紅旗勇將冇對手

猪拉多纳

　　第六場三班1200米。「閃耀之星」初出之前試泥閘，畀人嘅感覺係速度唔錯，但係咪走勢去到好吸引地步，坦白講，自己唔係咁覺得。不過，隻馬落場跑，表現出超強水準，如果鞍上人末段多啲配合吓，就算入唔到三甲，都肯定唔會輸兩個幾身位咁多！

　　雖然，郭立基久唔久會打反手鞭，唔係咩稀奇事，但如有留意此駒在直路表現，騎者催騎動作的確唔夠實淨，或許出彎後隻馬唔能夠即刻畀到反應佢，令佢以為坐騎衝勁唔多，所以，唔係咁出力騎。而約在直路中段，馬兒完全係自己衝上嚟，瞬間可從外檔冚上跑入第五名，睇嚟隻馬嗰份鬥心堅得，以及插班個分完全冇問題。一經「曝光」，今場即加程及換人，意識應該好正面噃。

　　第七場三班1200米。「紅旗勇將」上季發揮正正常常的話，可以當「夢仙」、「勁信心」冇到，邊會係三班留得低嘅馬。而季前準備總算做妥，沒有太大壓迫力，但早前大閘，拉士吊住仍肯追，亦輸唔係好遠畀對手，睇嚟唞完暑出番嚟操，進度唔算嚟得太慢。雖然今仗重磅及外檔可能會有影響，如轉4歲比前略進步，要擊敗此批對手，唔覺有咩難度。