征日失敗一肚氣 方+柏嗒糖補數

猪拉多纳

　　方嘉柏今季4W未預柏寶份，啱啱一齊征日，「天久」喺內欄塞到阿媽都唔認得，搞到P都冇，二人梗會換嚟一肚氣。呢期騎練忽然多合作，一共5駒之多，唔通今晚想大舉出擊，發洩吓冤屈氣？！

　　至於今期佢哋兩位合作馬中，講真又唔係隻隻都有贏面，至少12檔處女馬「清脆利落」，阿Jack唔敢買先啦！另一方面，「薄荷糖」、「閃耀小子」、「綠色寶」機會則唔錯，王者應在其中。

　　「薄荷糖」上場田草1400米，差唔多全程外叠，返到直路仲可以衝段22.18秒殺入第四名，認真犀利，如果今場前中段步速唔係又慢吞吞，而隻馬亦適應到谷草，直路唔會有對手後勁好過佢。

　　而「閃耀小子」初出1200米入Q，輸畀頭馬幾遠，但我懷疑係佢當時狀態未十足所致，希望開完氣之後，比賽時叻過上場。最後一提，「綠色寶」P都未跑過，感覺上未有證明能力如何，但一再有接近演出，而今仗更初次用到柏寶，方仔有此安排，斷唔會係冇意識攻堅。　

Jack