國足強陣搶W省招牌

猪拉多纳

06/10/2011
文： 走肖

今晚國足喺熱身賽主場對阿聯酋，備戰緊接對伊拉克嘅世盃外，舉行地點係深圳嘅龍崗大運中心體育場，即使香港冇直播，球迷都可以選擇北上現場助威。比賽方面，國足主教練甘馬曹為咗省番靚招牌，重召恒大中鋒郜林開路，梗係想打沉冇人帶得掂嘅阿聯酋開主W啦！（廣東體育及中央5台周四晚7:35直播）


計陣容，國足表面上有唔少隱憂，點解咁講？事關未開波前已經有中場蒿俊閔同中堅李學鵬打柴。同時，中場趙旭日同中堅馮瀟霆又有傷在身，估計呢4位都唔會落場，至於効力葡超球隊比拉馬嘅前鋒張呈棟，則因為遲歸隊嘅關係，據講今晚都唔會冒險上陣，前鋒韓鵬、中場曲波、楊昊同左閘榮昊又冇入選，搞到個陣好似好殘咁。不過，查實除咗中場大將趙旭日最受甘馬曹重用外，呢班唔出得嘅國腳全部都係替補二線兵，正因為佢哋未能候命，主教練甘馬曹至焗住要用強陣打真軍。

重召恒大弗爆射手郜林

賽前甘馬曹仲話，當正阿聯酋係世盃外對手伊拉克，暗示會排出強陣應戰，最近助恒大提早成為中超冠軍嘅郜林，更加獲得重召，而且喺練習賽表現唔錯，至於連續2場冇波入嘅楊旭就即刻被棄用，其他國腳見到咁嘅情況，邊敢揸流攤呀！

阿聯酋友賽輸畀中甲仔

另一方面，對家阿聯酋喺世盃外連續輸畀科威特同黎巴嫩，出線凍過水，教頭卡坦歷即時冇得撈，曾經係波斯尼亞國家隊主帥嘅佢都帶唔掂，試問新教練鴨都拿馬斯化有咩本錢做救世主？日前阿聯酋喺練習賽，夠膽死以0:2不敵中甲球隊廣州富力，睇得出隊波冇質素之餘仲已經散晒，士氣崩潰唔爭在輸多場。