獅吼衞冕第一擊 狂噬水手

猪拉多纳

08/10/2011


澳職今日勁爆開鑼，首周即刻安排上季總決賽翻版戰畀球迷歎，冠軍布里斯班獅吼喺主場對亞軍中岸水手，原本勢均力敵，但近日有報道話，水手財政出現問題連9月份人工都未必有得出，未開咧就搞啲咁嘅嘢，士氣唔慌好，梗係熱捧獅吼主W穩陣啦。（有線64及204周六下午5:45直播）




獅吼上季歷史性奪得常規賽冠軍，跟手喺季後賽總決賽以互射12碼砌低班水手，登上澳職總冠軍寶座，雖然佢哋上季常規賽分別攻入11球嘅射手桑蘇拿辛奴同巴巴路西斯離隊，但新簽入嘅比勒費爾德前鋒貝利沙同賀森斯中場伊法中島法蘭，分別係阿爾巴尼亞同加拿大國腳，足夠確保「獅吼功」有更強威力。


獅吼新援細佬踢南華


講起伊法中島法蘭，佢細佬其實就係依家効力南華嘅中島法蘭，轉會前曾經一齊踢賀森斯，據獅吼教練保斯迪高路講，佢哋嘅進取打法，任何攻擊球員都會鍾意，而且貝利沙同伊法中島法蘭好快就入咗局，覺得隊波夾得好流暢。咁梗係啦，上季喺常規賽交出12次助攻嘅澳職助攻王布萊治留隊，獅吼當然掂。


中岸水手冇糧出


另一方面，水手被爆有嚴重財政危機，上個月糧都唔知出咗未，但高層就死撐話，其實所有澳職球隊都有財政問題，佢哋好快會搞番掂，唔否認即係默認冇糧出，對家獅吼上季常規賽連季後賽連續28場不敗，期間6次對水手有3勝3和，餓咗波咁耐，睇怕又會喺主場發惡咬死水手。


布里斯班獅吼 Vs 中岸水手


日期 賽事 主隊 客隊




11/03/13 澳職季 布里斯班獅吼 0:0（0:0）# 中岸水手

11/02/26 澳職季 布里斯班獅吼 2:2（0:2） 中岸水手

11/02/19 澳職季 中岸水手 0:2（0:0） 布里斯班獅吼

11/01/12 澳職 中岸水手 3:3（1:1） 布里斯班獅吼

10/11/28 澳職 中岸水手 1:5（0:3） 布里斯班獅吼

10/10/20 澳職 布里斯班獅吼 2:0（1:0） 中岸水手

#加時2:2　互射12碼獅吼贏4:2