棟悉先機：天賜福星內檔發威

猪拉多纳

　　今期沙田日賽跑夠11場，鍾意場場玩兩手嘅馬友，真係過足癮，當然，有得玩之餘，最好荷包有進帳，咁先至係雙贏！講到今期賽事，老老實實，特別多熱門馬浮面，至於邊啲係陷阱？邊啲信得過？望落都係下半場嗰批有揸拿多啲，希望到時唔好爆到七彩。

　　第七場三班1200米泥地。「天賜福星」上場捧到3倍半大熱門，結果喺同程放至埋門力弱，只得梗頸四，當時究竟衰啲咩，主要係放得快咗，望望首兩段段速，比正常快約5線，但又唔可以怪晒白德民，季內初出口重難留話唔埋嘛。經過1場熱身洩洩火，今仗在控制上應更乖，估計再排內檔嘅佢，威力會增強不小。

勁贏晒有機可乘

　　第八場三班1600米草地。「勁贏晒」初出成熱三甲不入，唔係冇實力，而係冇運！當日落雨唔多利太後去追，所以直路衝得行都冇用，冇得好賴，隻馬跑法冇得變嘛。今仗復於正常場地上陣，又喺A欄，形勢已不同，而如果同場快放馬早段唔慢，直路佢就有機可乘。

　　第十一場三班1400米草地。「紅山茶」初出贏得「添福駿驥」及「薄荷糖」，至少值二班上中級數，千祈唔好話阿棟講得誇張，唔係超對手至少二三十分，邊有可能咁樣贏！而上賽季內初出表現合乎預期，只要進度保持，有望食尾胡。

點買法

　　今期揸住一對熱門馬嚟買，「天賜福星」及「紅山茶」兩隻都係3倍左右大熱門，如成功過到關，其實都唔錯。至於QT場次揀埋第七場，希望順開就順，再次成功排隊返晒嚟！

資深評馬人　陳華棟