馬主論戰

猪拉多纳

勁加勁重返勝途

　　今日鄭俊偉出馬唔算多，但我睇好佢可以贏馬，甚至起孖。先講第五場「勁加勁」，上場跑1400米輸唔遠，熱身之後，今場跑番贏馬路程1600米，用埋最夾嘅杜利萊操刀，贏得。

　　另一匹要吼實嘅鄭廐馬，係第十場「金鎸龍華」，上季跑兩場贏晒，仲要贏到「皇帝法令」、「勝利之星」等惡馬冇得跑，質素真係深不可測，繼續跑1200米唔易搵對手。

張敬山

甜將二班着數

　　大摩剛啱憑「馬風雲」同「紅旗勇將」起孖，搏殺手風轉順，今日捧佢啲馬應該冇錯。鍾意第十場「甜將」，上季同「勁飛寶」互有勝負，後駒依家評分高達122分，反而呢隻馬只評99分仲可以跑二班賽，試問邊度有對手？

　　另外推介第九場「軍事行動」，在港九戰仍未贏，無疑有少少失望，但今次轉跑泥地，對手實力差一截，話唔定可憑級數取勝，值得捧場。

任達華

帝豪駿駒泥料

　　剛戰巫斯義來港，即刻憑「邦先生」贏馬，盡顯功架，今日一於吼實佢手馬。推介尾場「大家勝利」，呢隻馬今季一出即勝，反映狀態嚟得快，上場增程跑1400米，亦只係輸少少返嚟，今次換巫斯義操刀，應該可以贏馬補中。

　　另外推介第七場「帝豪駿駒」，上場響田草1200米贏得好精采，五歲馬已適應晒水土之餘，肯定仲有分響手，轉跑泥地應該啱發揮，要吼實。

寇鴻萍、梁廷鏘