洪禮賢講馬：明旺音樂家勁加勁紅跑車 點石成金天賜福星帝豪駿駒肥仔糖

猪拉多纳

　　今日九草二泥賽事，草地用A欄，近日冇雨，如場地正常，熱門實力馬冇咁易出事。

　　至於騎師方面，韋達和柏寶無可避免受熱捧，其中前者可以話由頭熱到尾，希望到時唔好令捧場客失望。

重心場次　第11場　第三班（80-60分）1400米草地

　　「紅山茶」初出未夠態，跑質多過跑進度，而在沿路跟得唔係好順、直路曾受困兼慢步速下，尚可入P，進一步顯示虛分多，假使開氣後稍有進展，已具贏面。

「好食德」此程曾勝，熱完身轉程係好事，由於本身夠班有凸，上三班換來輕磅有好冇壞，只要處境冇上場咁差，未必冇得同前駒鍊過。

　　「大家勝利」剛仗放快咗（比同日二班快幾線），最終僅輸少少，未必完全係地利關係，亦可能當弗，總之，有銳氣而換人，機會仍樂觀。

　　「永勝多」用番眼罩並縮程，用意向好，至於近兩仗跑成點，根本冇太大參考性（留得太後及擺得太前），究竟係咪老退？睇埋今場再算。「城市之光」初出喺直路撻咗好耐至衝得行，加程應幫到。「香檳歲月」和「雙龍出海」，如步速慢，或可博懵。　

第1場　第四班（60-40分）1200米草地

　　「幸運金龍」對住一批新馬班對手，形勢大好，只要唔係自己負重能力差，應贏。「風雲」初出表現與預期差好遠，希望係未熱身所致。

　　「履皇朝」唔係短途馬；「同一理想」暑後進度唔係嚟得好快，兩駒爭腳居多。

　　「路路好」仍未識留力，除非今日跑道好利放，先有機會憑快放入到前列。

第2場　第五班（40-10分）1200米草地

　　「厲行星」贏得「龍船快」，加8分仍有賺，倘臨場情緒繼續淡淡定，再W。「上浦駿將」和「快意」，初出未算十足也有接近演出，寄望熱身後，今場或有反先之力。

　　「飛天龍駒」以上場谷草追勢，長直路會有助發揮。「風度翩翩」與「時時有機」有班，卻可能受制於外檔。

第3場　第五班（40-10分）1600米草地

　　「歡樂寶寶」兩戰後換人，以及跑短200米，均是利好因素。「大鷹勇」大冷過後，基本條例冇大變，宜跟多場。

　　「駿馬飛騰」衝力唔長，2檔而有埋巫帥，會幫到發揮。「金剛驃」如果又出現上場早段人馬角力鏡頭，隨時再次影響整體表現，惟盼人馬各有各進步。

第4場　第四班（60-40分）1200米草地

　　「超級精神」上賽大閘呃晒，騎極都係反應曳，偏偏落場跑係另一回事，有可能起步分太筍。「神聖駒」柏寶試好唔騎，揀咗「勁賽王」，論大閘表現，後駒略好。

　　「勝利金剛」初出跟得急，但拉士唔係莫晒氣，速度感猶在，略有驚喜，今仗2檔及轉程，希望演出會有進步。「天佑八方」試閘仍新嫩，又係跑質。「一路奇兵」係擔心外檔令留放不暢順。

第5場　第四班（60-40分）1600米草地

　　「明旺」唔介意上場名次落後，輸喺直路塞車咋！轉番草地而肯跑1600米，幾有誠意，預期會比前仗衝得勁好多。「音樂家」早已指出暑後工序有甩漏，所以，跑兩場輸晒唔奇，但見復課試跑有番mood，如改配件及內檔幫到，隨時變身。

　　「紅跑車」及「勁加勁」，有晒卡士，係跑法較蝕。「足智多謀」、「勁擊」和「實業英雄」，剛仗水準要有待再證明。

第6場　第四班（60-40分）1400米草地

　　「夢幻魔術」上場前已讚過喺第2課大閘明顯貫注力好咗，跑落亦比預期好（直路一度冇位），證明今季有進步，此際加程正合時機。「喜運財星」按上季尾賽績，三班都有得爭，何況四班！只忌重磅。

　　「陽光普照」及「幸運來」，好大可能慢鬥慢，賽事環境有利。「真慷慨」係喺直路賽追得好，不過，斜跑和側頭毛病仍在，希望加罩有助，同埋，轉彎路程勝任。

第7場　第三班（80-60分）1200米泥地

　　「點石成金」大步馬，排外檔唔怕，除非唔啱泥地，以佢能力，喺呢場嘅分量數一數二。「天賜福星」明顯因初出難留放快咗，跑過1場如冇咁促，應有助操控。

　　「肥仔糖」剛仗拍住前駒同到，再跟。「帝豪駿駒」仲係打緊天才波，中短線會係二班夠贏之輩。「時代明星」與「常山鳳寶」冇分在手，係跑形勢。

第8場　第三班（80-60分）1600米草地

　　「勁贏晒」1隻熱晒，唔夠兩倍W，的確太熱，不過，以剛仗地慢而佢好蝕都輸近，今仗加程並場地正常，可能叻好多。

　　「勝利就手」跑完1場唔瘦，預期今場又會比上賽衝得更好。「快利多」係怕外檔留唔到，如計出賽時間表，應該差唔多。「勝蹄飛」入Q一役跑得好盡，回唔回夠氣，落場至知。「非常精」泥閘試得靚，係蝦佢初出未開氣跑此程。

第9場　第一班（105-80分）1650米泥地

　　「好得意」泥閘喺最後百幾米一騎即有反應，印象幾好，而本身場地性能又正，11檔未必驚。「幸福紅椒」路短追得好，即轉場及增程，有心搏。

　　「經典皇牌」和「軍事行動」初出比預算差，唯有推諉未熱身。「迎風起舞」細細隻，轉泥要博，但初出揀佢時已指出，季內工序妥善並進展幾好。「快人快語」可能濕泥至啱。

第10場　第二班（100-80分）1200米草地

　　「鷹之團」唔係轉彎路程考起的話，今場仍是主角。「金鎸龍華」能輕勝「皇帝法令」，二班邊會留得耐。

　　「旺當家」季初首仗即勝，贏得太易。「甜將」又係不可多得4歲仔，14檔其實唔使太介意，只因佢跑法幾彈性。「皇帝法令」與「禮尚往來」，同樣具爭勝能力。

馬會賽馬節目主持　洪禮賢