幸運金龍苗準新馬錦標

猪拉多纳

尋日舉行季內首場只限三歲自購新馬及拍賣馬出戰嘅四班賽，結果都係由上季唯一贏過新馬賽嘅「幸運金龍」大熱掄元，連同亞、季軍「風雲」及「履皇朝」，構成本季暫時最熱W、QP、T、單T及四連環派彩。呢場變相三歲新馬賽，始終以成熟程度分出勝負，不過對於頭馬「幸運金龍」嚟講，馬主梁文謙就自視相當高，因為呢匹馬父系，正係佢爹哋梁啟徽名下「幸運戰駒」，過往響香港服役已經有唔錯表現，其後運返澳洲改攻千四、千六米，效果亦唔差，所以「幸運金龍」今鋪復出雖然贏短途，但梁文謙指愛駒唔單止贏在早熟，日後跑中距離，威力可能更大。
       
幸運金龍收韁贏馬。

「幸運」系掌舵人梁啟徽尋日見證自己培育嘅新馬跨季再捷，賽前佢就話苗禮德相當好信心，至於贏完升班下一場部署，應該會揀場千四米跑，然後就會直指12月17日舉行嘅千四米新馬錦標，呢場賽事只限三歲自購新馬參加。