伊拉克戰意爆燈頂得住國足

猪拉多纳

11/10/2011


今晚世盃亞洲區外圍賽，A組嘅國足喺深圳迎戰伊拉克，有線會全程直播，各位冇上深圳打氣嘅朋友，記住捧場喇！小妹唔係唔想撐中國隊，不過國足班人踢波未交出應有水準，但就勁有「星味」，Hea踢、孭名牌袋、擺款……唉！雖然想國足贏，但講到投X，都係買士氣勁爆嘅伊拉克1.95倍「讓球客勝」好啲。（有線61、64、201、204、廣東體育及中央5台周二晚8:15直播）




投X同愛國真係要分得開，相信唔少球迷之前信國足都搞到焦頭爛額，一早死咗心。國足為備戰今晚場波，喺早兩日同阿聯酋拍跳過一課，係就係佔盡優勢，不過埋門一腳真係睇見都搖晒頭，仲要有埋失波添，激到教頭甘馬曹生蝦咁跳！


甘馬曹否認講過「獨子論」


講開甘馬曹，小妹都好佩服佢嘅「獨特諗法」。日前有報道指呢位西班牙名帥接受外國傳媒訪問，竟然幫國足班人搵藉口，話中國人家庭觀念重，一眾國足大部分都係家中獨子，因為畀人寵慣咗、又因為怕受傷至咁錫身喎！甘馬曹尋晚雖然否認咁講過，仲話會改造隊波，踢得更緊迫同更狠喎！係咪真都好，即使係改造都需要時間，今晚未必立即見效啦。




仲有，尋日深圳落大雨，仲出埋黃雨警告，國足班人只係練咗一陣波，冇乜點練進攻，反而集中練防守，賽前內地傳媒估計佢哋會踢451，睇怕國足今仗又係踢穩守突擊，要讓波？點靠得住先？


伊拉克雙管齊下振士氣


伊拉克教頭係巴西名將薛高，佢就真係幾醒目，本身伊拉克約咗深圳紅鑽拍跳，但佢轉頭就Cancel咗，梗係啦，如果你係紅鑽班人，都會幫國足踢傷伊拉克幾件啦！況且伊拉克足總勁識做，賽前宣布會補發訓練津貼同上仗贏新加坡嘅獎金，贏咗中國仲有得加碼添，佢哋位球隊經理仲走出嚟話，中國人之前投訴伊拉克治安差，夾硬搶走伊拉克主場，希望藉此雙管齊下激勵士氣。戰意爆燈嘅伊拉克，真係有權頂住國足o架！




亞洲區A組

北上打氣錦囊

深圳市體育場位於深圳福田區，如果香港球迷今晚有意北上睇波，最好由落馬洲口岸過關，因為除咗可以坐的士，仲有多條巴士線（大陸叫公車）去到球場，只不過散場之後返香港，就一定要去羅湖口岸喇，因為落馬洲口岸夜晚10點就拉閘。

啱使公車線

212路：由皇崗村開往東昌方向，體育館站落車。

213路：總站福田客運站開往布吉聯檢總站，體育館站落車。

385路：總站福田保稅區開往布吉元平學校，體育館站落車。