棟悉先機：火燎腚 叉足電放到

猪拉多纳

　　天有不測之風雲，昨日天雨不停，今日天氣應該唔會好得去邊，谷草A欄又如何，可能又出現嚴重偏差都唔定，臨場自己要執生嘞，咪一味睇住之前賽事模式。今晚賽事，韋達呢位老兄，又會有好多熱門，贏到幾多件？唔敢估，總之希望唔好似上期「一招了」就算嘞！

　　第四場四班1200米。「火燎腚」前仗季內初出，表現幾犀利，喺田泥1200米段段快之下，返到嚟仲頂到個P，但有可能都係因為用多咗力，以致上場跑唔番。經過1場回夠氣未？有時好難賽前預測，要以臨場眼見為真，不過，呢次有1檔之利，隻馬又夠快，地淋亦可能利放頭，夾夾埋埋，有利啲因素，如果佢真係叉番足電，可一放到底。

　　第七場三班1200米。「吉利大師」未跑過偏軟場地，亦唔知休出跑得出幾多成功力，但有一樣可以肯定，佢喺三班幾超，四班半力擊退「樂融融」，三班此程贏到「勁有盈」及「紅旗勇將」冇得跑，保守估計仲有兩W未兌現，博賠率係要吼今場初出！

　　第八場二班1650米。「俊鬥仕」上場季內首仗表現冇預期咁好， 衰在形勢唔就，所以唔好硬係話細路仔處理有問題。今場轉用黎海榮用意唔估嘞，不過，練者寧願隻馬負重，睇得出有背城借一之意。而回降二班出賽，亦會有助爭勝。

陳華棟