洪禮賢講馬：蓬萊仙子俊鬥仕智友喜勁飛

猪拉多纳

　　睇完天氣預測，個心涼咗一截，今日可能密雲有雨，一遇變化地，有時真係冇得好計，所以，今期A欄賽事係咪會比較均等，冇話後追實聽衰，要臨場先至有定案。

　　而今晚無疑係東廐及韋達嘅舞台（賽前預料），寄望可以做番齣好戲，尤其係後者。

重心場次　第5場　第三班（80-60分）1800米

　　「赤胆雄威」冇穩定性可言，一個唔好彩，又臨場發癲，又或者喺閘內搞一輪，唔慌會跑得好，不過，上場見佢臨場冇情緒問題，落場跑亦追得唔錯，脾氣有改而冇令能力消失係好事。而本身係嚟得快一族（近季不出頭兩仗便可入圍），熱身後肯加程配合，有動靜。

　　「馬主光輝」剛仗賽前已指出分數太筍，同埋，上季尾有回勇迹象，一旦跑得番八九成真係夠殺，既然上場衝得唔順兼路短亦輸近，轉到此程冇理由唔追。

　　「財駿福星」贏完兩W狀態仍銳，朝早唔覺有攰嘅感覺。「可愛人生」仍未去番十足水準。「安穩」贏馬係咪全靠形勢，其實有點保留。「福陞」明顯初出輸在路程及騎師，換人及轉場，有晒變數。

第1場　第五班（40-10分）1650米

　　「天下寶」純以早課眼睇，配巫斯義發揮或比韋達更勝任，降班後太超，抑或係空想，睇埋今場。

　　「金得意」及「盈嘉飛駒」位靚、績好，正路配腳。「創先機」初出楔內欄衝得唔錯，此程亦早有經驗，大幅加程亦咪睇小。「過關勇將」預期除眼罩會有助，係12檔唔知小晉會點應付。「確叻星」熱完身係有進展，不過冇預期咁大。

第2場　第四班（60-40分）1000米

　　「喜萬家」與韋達好夾，此程又早有證明，而上場明顯係出閘慢，以及中段被壓後走快咗，仲有第四已收貨，希望今場整體發揮好番，可提升名次。

　　「綠衣郎」暑後見馬身淡色、個身有啲圓轆轆，而草地賽冇點「騷」過實力，但估計以佢速度，喺四班夠用有餘，如地慢可能易於應付。「祥禎」及「金財子」，跑形勢，不過，好難有機會並存。「東方駿馬」試跑未覺有上季當打時氣勢，八九成左右。「好妙星」近況唔錯，跑短200米亦會好。

第3場　第四班（60-40分）1650米

　　「大將軍」未定性，朝早有時跑跑吓豎尾較奔放（喺內圈亦會咁），所以剛賽轉前置係好事，如果今場仍舊擺前，效益或比喺田草更大。

　　「奄尖大少」及「神勇馬車」，俱有往績支持，而兩駒都係要靠好位幫手，今仗排4、5檔可能有行。「開心歡樂」唔係11檔，根本係膽材。「電訊高星」大閘省落去反應好，感覺上冇咗上季頹勢，但有可能只係睇得啫，不過，班底高有賠率，值得博冷。「浪漫添馬」跑到第3回，進度又會再推高。

第4場　第四班（60-40分）1200米

　　「火燎腚」及「威威加瑪」，預咗呢對馬早段鬥法，如果唔係鬥燒，有機會齊齊帶返嚟。

　　「駿方」有級數，5檔則未必易切入，要視乎際遇。「超勝」希望唔會似上季喺第3仗走樣。「利駿」埋尾單試過步敏捷，加罩針對縮程，用意向好，係要睇慢地識唔識。

　　「龍得風雲」和「好辣椒」淋地有根據，惟上賽表現並不理想，打水戰先會預佢哋一注。

第6場　第三班（80-60分）1650米

　　「魅力星」漏閘，加上，賽事中一再遇意外，仲可以衝入前幾名，算係本事，難得復課練者冇錫住呢匹細粒馬，而隻馬又冇轉瘦，睇進度進一步，今場有1檔，如唔再慢閘，咁輕磅，有權贏。

　　「正黃旗」完全唔鍾意上場騎者直路嘅搵位意識（係咁塞車亦輸唔遠）！而換人與增程係好事，只要今場唔好早段太慢，直路佢會有嘢睇。

　　「靚到爆」暑後曾缺課，之後快跳1課就出嚟跑，仲要陣中擺得過前，咁都唔大敗，佩服！復課跳得番，快試亦見爽，防今仗變身。「帝豪名駒」贏馬姿態犀利，只係佢向來唔可靠。「心中有程」及「朝東飛駒」或會賺到慢步速形勢。

第7場　第三班（80-60分）1200米

　　「沙紙」1檔兼形勢好跑，似足上季贏馬時，再者，上賽冇欄又二叠望空都有Q，水準要尊重。

　　「特好」休出馬如其名（3季初出冇W有P）。「但求勝」速度夠又韌，除非賽事途中有意外，若不，三甲應有。「吉利大師」係蝦初出未撻着。

　　「競駿寶寶」冇晒上場優勢，不易突破。「珠光寶氣」入Q水準有待再證明。「聚有盈」好大可能評分已見頂。

第8場　第二班（100-80分）1650米

　　「蓬萊仙子」究竟換人後會唔會又放得過快，好想知演繹效果會差幾遠（千祈唔好係「萬子千紅」翻版），總之，上場尺寸有挑剔亦幾乎贏，唔係搏散咗可補中。

　　「俊鬥仕」只要際遇唔好似上場咁唔就，以現時狀態唔難上名。「智友」路程專家、「喜勁飛」跑得番，正路配腳。

　　「金碧亮馬」睇準備有心搏今場，事實上，大閘走勢也討好。「愛睦善」及「四季」，要大利前置才可起作用。