洪禮賢講馬：終點前幾步無謂慳力

猪拉多纳

　　兒時接觸賽馬之初，當時外籍騎師已經唔少，名字多到數唔晒，如伯嘉、艾法誠、彭瑪、華卓良等。之後，騎師陣營一批又一批出出入入，隨便數數有馬素爾、馬佳善、靳能、巫斯義、雷誠，至於先後次序真係唔多記得清，不過，佢哋幾個，各有令人留下印象嘅事情。

　　其中馬素爾曾夥拍「計惑」贏國際賽；馬佳善騎姿一度令人接受唔到；靳能贏完馬完全冇表情；巫斯義化身法國旋風；雷誠係馬場警察。

　　上述幾個騎師當中，比較有印象會係馬佳善、雷誠及巫斯義，佢哋共通點係成日有馬贏，洪某年青時代嘅使費，好多係靠佢哋。而那個年頭，巫斯義拍賓康，簡直係鈦金屬組合，堪稱多產馬房，什麼「意利高」、「碧玉海」、「喜蓮之星」等等，雖然熱就熱啲，勝在穩。

競賽小組嚴詞譴責

　　眨眨眼，原來接近廿年前嘅事，而巫斯義仍然活躍馬圈，年事高，但唔代表骨頭脆，好多馬喺佢手上成功「活化」，例子唔使舉出太多，淨係最近贏嗰匹「邦先生」，佢全程點樣老定，將1匹均速馬改造成後上，的確令人拍案叫絕。不過，叻還叻，日前騎隻「天下寶」認真有問題，賽後亦被競賽小組嚴詞譴責。又係嗰句，最後三幾步，騎埋佢有咩所謂，慳嗰幾步氣力，如果出咗事，既唔抵，可能仲要破費！

馬會賽馬節目主持　洪禮賢