洪禮賢講馬：好友福 卡士高晒

猪拉多纳

　　第九場三班1600米。「智多飛」如果要再等班內田草1800米，去到11月初先有賽期，可能係冇選擇之下至縮程，不過，佢喺此程曾一放到底，路程能力唔會比1800米失色，尤其目前只係跑到季內第2仗。

　　至於，上場初出表現，衰在出閘唔利落，焗咗喺後列，而直路中段三番四次夾在兩駒之間後面，等咗好耐至有空位，但衝幾步已跑第五，假設直唔係困守咁耐，三甲唔會冇佢份。由於今場冇咩馬早段特別主動，如果「智多飛」唔係又出閘失靈，好大機會畀佢放到頭，帶得順，放返嚟，唔意外。

　　第十場二班1400米。「好友福」啱啱喺一班1200米入P，冇錯，佢係沿路喺內欄慳好多腳程，但因為今場轉到1400米，又降埋落二班，賽事環境完全唔同晒，計法已經唔一樣，咪介意上場賺盡至入到圍。

　　佢嚟香港4季嘞，二班跑過5場，只得1場冇前兩名（輸嗰場喺內欄塞死），好似上季尾，咪又係孭到133磅，跑贏當時好準嘅「喜惑」，而與今屆廣東讓賽盃頭馬「富高勝」埋Q，級數可知。如果明日場地唔係太淋，佢喺直路應該會衝得好好睇睇。

馬會賽馬節目主持　洪禮賢