利物浦年度驅魔夜

猪拉多纳

15/10/2011
文： 樂比堅尼

英超「雙紅會」今晚爆發，紅軍利物浦主場迎戰紅魔鬼曼聯。曼聯季初得心應手，但花無百日紅，人無千日好，近幾仗表現已略為回落，加上國際賽「過冷河」，隨時淋熄曼聯團火，曼聯作客讓平半，樂比仔撐下盤。（有線300及200台周六晚7時45分直播）




曼聯季初順到開巷，所有賽事加埋一度創下十一連勝佳績，但自從作客畀史篤城逼和後，近兩仗表現都唔算好，先於歐聯主場和巴素利三比三，上仗主場對諾域治，都係踢到下半場中段先打破僵局。所以有理由相信曼聯季初去到太盡，依家已進入調整期。


紅魔早場作客不利


事實上，一支球隊幾強，都冇可能場場贏落去，尤其係曼聯作客成績一向唔算突出，上季聯賽作客勝率僅得26%，對住一支今季主場不敗嘅前列勁旅，試問又點讓平半？唔好忘記曼聯近三次作客晏菲路都落敗！




曼聯另一個不利因素，係今仗安排踢早場，樂比仔一向認為早場對客軍不利，事關要重新調整生理時鐘，睇番曼聯上季早場兼作客嘅成績，六場僅贏兩場，作客愛華頓、保頓、阿士東維拉同布力般流浪都贏唔到，就算贏西布朗同韋斯咸嗰兩場，戰情都非常驚險！




利物浦今季最大優勢就係唔使兼顧歐洲賽，球員養精蓄銳唔驚踢殘，雖然季初表現唔算好標青，但勝在四平八穩，紅軍以往每逢對曼聯都會踢高幾班波，趁曼聯集多項不利因素於一身，一於捧紅軍！