拜仁勒住踢好守細

猪拉多纳

15/10/2011


今晚拜仁慕尼黑主場對哈化柏林，成為德甲方面熱話，皆因拜仁後衞謝路美保定同哈化中場賓哈迪拉將母親作「賭注」，負方嘅媽媽需要煮拿手好菜畀勝方食。今場主W熱爆燈，謝路美保定或者會有餐好食，但拜仁唔少主力剛踢完國際賽，下周中又要兼顧歐聯，唔會搏得太盡，入球大細中位數3.5球，要入球細。




（有線61及64台周六晚9時30分直播）




球員私下賭餐飯唔出奇，但今次將伯母搬上枱就比較少見，為顧及家人面子，謝路美保定同賓哈迪拉應會特別落力。不過拜仁身為大球會，點會同佢癲，球隊聯賽歐聯雙線作戰之餘，大部分主力剛踢完國際賽，今次對弱隊，隨時畀佢哋抖。


列貝利未操起


加上洛賓因傷缺陣，列貝利啱啱痊愈，未必披甲，睇埋拜仁近五仗總入球都唔超過三球，連續十一場冇失波，相信哈化好難入到波，大細中位數3.5球，開細機會高。