棟悉先機：明海光輝實力超級

猪拉多纳

　　好在今日唔落雨，個心都定啲，始終風雨情況下跑馬，有時唔怪得晒部分騎師嘅「安全意識」，命仔攸關，安全第一最重要，唔會跟馬太貼、寧願在大外叠蝕、轉彎有咁開飛出咁開，真係唔鬧得佢哋。但正常場地作賽，如果佢哋唔畀心機，我哋就可以鬧爆嘞！

　　第四場四班1200米。總認為「明海光輝」實力在四班係超級，曾經與四捷明星在同程鬥到最後一步，又曾經輕勝「快樂無窮」，如果冇番咁上下能力，邊有咁嘅成績交出。睇隻馬嘅準備，安排得幾完善至出賽，睇嚟有心搏呢場，事實上，去季初出已幾乎贏得，唔排除休出特佳，只要8檔起步順順利利帶出，有力一放到底。

　　第七場三級賽1800米。「卡達聖」估唔到上場1400米一樣追到入Q，新鮮感還新鮮感，路程咁短，而直路亦曾經被困塞過，拉士仍可愈追愈勁，真係跑得好過預期好多。熱完身轉番長途，當然好跑得多，用番主帥白德民，睇嚟會係主力，雖然重磅未免令實力打折扣，由於卡士夠而進度已起，相信要喺今場盃賽逞強，機會幾大。

　　第十場二班1400米。「甜橙」係上季尾崛起新星，跑3場得WQ各一，當佢一轉到此程，即有更強威力，曾經輸少少畀「驌龍」，翌仗補中本來唔意外，但可以半力輕取當時弗爆嘅「喜惑」，真係幾犀利，睇嚟至少值一班中級實力。而由於博賠率係吼今場，我就寧願買早1場嘞！

點買法

　　馬房手足透露，今日阿摩兩件都有料到，第四及七場，一於自製大摩孖寶。而QT重心場次．都係揀第七場，３膽拖１２　４　７，希望唔好太熱，贏番餐下午茶。

資深評馬人　陳華棟