馬主論戰

猪拉多纳

如意算盤拔頭籌

　　剛啱夜賽「金得意」順利連捷，高伯新嘅功力有目共睹。

　　今日高廐出三駒，我睇好頭場「如意算盤」，上場轉高廐初出，響田草1400米跑第七，只係輸畀頭馬個半馬位，表現大有起色。今次大幅增程跑2000米，高伯新應該諗過度過，加上卓利依家仲未開齋，必加多兩錢肉緊，捧得過。

　　另外推介第九場「精奇」，上場追得似模似樣，今次增程跑1600米應更啱，可以補中。

張敬山

芙蓉威龍三班惡

　　剛啱沈集成憑「馬主光輝」贏馬捧盃，唔經唔覺今季已經贏咗八場頭馬，暫居練馬師榜嘅榜首位置，認真威水。今日沈廐出馬唔少，隨時又有頭馬見面，推介頭場「威陽」，上仗贏得相當輕鬆，證明響現評分真係好着數，加程跑2000米一定應付到，贏多場冇問題。

　　另外鍾意第八場「芙蓉威龍」，上場走大外叠轉彎，一樣衝贏晒對手，絕對唔係靠符碌，繼續跑三班賽點會冇贏面？

任達華

卡達聖級數秤先

　　今日重頭戲婦女銀袋賽，大摩派出「卡達聖」同「曬冷王」雙龍出海，睇嚟志在必得。

　　兩駒之中，我比較鍾意「卡達聖」，上場跑國慶盃只係輸畀馬王「雄心威龍」得第二，壓倒「締造美麗」、「軍事攻略」等強敵，實力唔講得笑，今次增程可以掃晒。另外推介尾場「續領風騷」，上季可以壓倒「家樂飛」贏馬，後駒今季兩戰非勝即位，賽績夠晒硬淨，跑得番應有水準唔易搵對手。

寇鴻萍、梁廷鏘