黑貓又做阿仙奴細界

猪拉多纳

16/10/2011
文： 麥馬拿仁

阿仙奴今時唔同往日，前面各有各踢、中場質素不足，之前三輪主場勝仗只係表面風光，今晚喺阿聯酋航空球場迎戰新特蘭，苦戰難免。「黑貓」硬淨死守有一手，近六次作客兵工廠全開細盤，咁好路點可以唔追？




（有線200及300台周日晚8時30分直播）




未計尋晚英超其他賽事，阿仙奴聯賽榜排緊十五，呢隊已經再唔係以前嘅阿仙奴。雖然目前球隊傷兵減到得四個，但韋舒亞、沙格拿同華美倫，屬於必然主力，大大影響兵工廠攻守能力。睇番現時陣容，入波靠晒尹佩斯同禾確特，謝雲奴周時球王上身死扭，場場都畀隊友鬧到狗血淋頭，可謂破壞多於建設；中場阿迪達、艾朗藍斯駁腳有餘攻力不足，阿仙奴以往細膩進攻踢法，依家只係得番個殼，係就係搓得唔錯，但去到禁區就冇乜板斧，難怪唔少阿仙奴球迷，睇直播成日睇到頭擰擰。


新特蘭作客好硬淨


阿仙奴對上三場主場都開贏加大，但對手分別只係奧林比亞高斯、保頓同梳士貝利，三軍都冇料，一係級數不足，一係就狀態奇曳，兵工廠靚績只係糖衣陷阱。再對上一場對史雲斯又如何？該仗佢哋只靠對手送禮贏一比○，今場鬥硬淨「黑貓」，入到一粒都偷笑。




新特蘭開季成績雖然麻麻，今仗賓特拿更因借將條例不能上陣，但咁樣目標反而仲清晰，就係死守攞一分。今季「黑貓」四場作客三次開細，而對上六次作客阿仙奴，全數開細而回，成條攤路有晒，唔跟就笨啦。