雙奴會撐愛斯賓奴

猪拉多纳

16/10/2011
文： 法比加輝

打吡戰往往激烈，上星期傳媒盃籃球賽八強就上演兩場「打吡」，三色台同東方都要A、B隊互撼，齊齊兄弟兵內訌。頭場就激啦，三色台B在落後一分下，完場前成功補籃反勝出線。


打波有Heart 頭現光環


至於加輝都有份打嘅東方B隊，就輸十幾分畢業，其實B隊近年只係魚腩，今屆能夠打入八強，都係多得老大哥阿峰萊利上身邀得幾名猛將加盟，好似造型似十足「Chosen 2」華拿祖嘅大隻中鋒阿鴻，仲有貌似崔建邦嘅得分機器Vincent，最可惜我哋倉卒成軍，默契明顯差少少，所以入到八強已經超額完成啦，大家下年努力吧。




雖然被A隊淘汰，但加輝都會撐佢哋，事關兄弟樂比堅尼就係A隊嘅老臣子。隨住年紀漸大，樂比仔已經由主力退居至大後備。不過加輝依然欣賞佢夠Heart，記得分組賽有場Easy Game，周身唔得閒嘅樂比仔堅持要到場比賽，當時我問佢點解咁傻咁天真，佢就懶型咁話：「其實有冇我都唔會影響賽果，但呢個係責任！」嗰刻真係有個光環喺佢頭頂囉。




推介方面，西甲早場華歷簡奴對愛斯賓奴，主隊實力普通讓唔起，捧「讓球客勝」。




（now 632周日晚6時直播）