阿仙奴地頭圍捕黑貓

猪拉多纳

16/10/2011
文： Yennie

愛一個人，除咗可以共富貴，更重要係可以共患難，更何況係愛一隊波！阿仙奴係小妹多年來欣賞嘅球隊之一，就算依家佢哋陷入困境，我都一樣唔會離棄佢哋。今晚兵工廠主場迎戰新特蘭，信得過佢哋主場威力同球員質素，我捧2.05倍「讓球主勝」！




（有線200及300周日晚8:30直播）




愛，當然唔可以盲目，但我認識嘅領隊雲格從來都係處變不驚，係個信得過嘅男人。冇錯，阿仙奴喺季初表現係麻麻，排緊15位，慘敗過畀曼聯，就算上輪聯賽對住宿敵熱刺都輸1:2，的確幾令人失望，但無論情況幾咁惡劣都好，「教授」喺保衞自己嘅領土－酋長球場就從未有退縮，除咗輸過一場畀利物浦，近排喺各項賽事主場取得4連勝，有地利，從來都係佢哋勝利嘅保證。


新特蘭賓特拿唔出得


事實上，佢哋喺主場對住「黑貓」嘅戰績真係冇得彈，近10次取得7勝3和。睇番佢哋人腳，沙格拿斷腳抖到新年係令我心痛，不過佐羅同哥斯尼都有望趕及傷愈復出；中場路斯基雖然有傷唔踢得，仲有阿迪達、艾朗藍斯同禾確特撐住，加埋前線有復出嘅謝雲奴拍住隊長尹佩斯，入球能力勁爆燈。




新特蘭其實都好慘，依家排16位，領隊布魯士比雲格承受更大壓力，隨時炒得。睇番資料，原來「黑貓」自83年11月起，就一直未試過作客贏阿仙奴，最慘係佢哋今仗前線有借將賓特拿唔可以倒戈，要搵南韓仔池東沅擔正，後防又有巴士利停賽、巴布爾因為涉嫌強姦入咗雪櫃，殘陣、作客兼輸質素，想輸少球都難啦！


微博傳情 \(^O^)/


10月中，天氣開始轉涼喇，又成日落雨搞到無咩太陽，船Ｐ都陸續完晒喇！不過熱愛水上運動嘅我，又點會忍得住唔出海呢？上星期打完風嘅第2日，我同朋友無懼風雨，繼續出海玩wakeboard。冇個太陽照住，海水凍咗好多，滑水嗰陣啲風迎面吹埋嚟，真係凍到騰騰震！今次出海最大嘅收穫，係可以親眼欣賞本港滑水高手親身示範各種高難度嘅動作，好似「超人」、「360」 等，就算喺陸地上，普通人都唔易做到架！

Yennie心水

阿仙奴（讓球主勝）