德國「孖堡大戰」博3.4倍和波

猪拉多纳

16/10/2011
文： 郭球奇

今晚德甲爆發「孖堡大戰」，弗賴堡會喺主場迎戰漢堡。雖然漢堡啱啱請得新帥芬克，士氣大振，可惜呢位「冠軍教頭」今晚仲未落得場，對住後防唔齊腳嘅弗賴堡，球奇覺得兩隊好大機會再次打成平手，3.4倍和波值博！




（有線61、64、201及204周日晚9:30直播）


弗賴堡 Vs 漢堡


漢堡今季戰績奇差，結果搞到高層大地震，先炒教練奧寧，換嚟預備組教頭魯度夫卡度素暫時領軍，之後體育經理阿連臣突然走出嚟做看守教練，點知唔夠幾日，又任命巴素利教練芬克做統帥。本來球奇都期待呢位前拜仁中場教波，皆因佢無論喺球員定教練生涯，都好有捧盃緣，可惜賽前漢堡官網話佢份合約要到17號先正式開始，今晚對弗賴堡將繼續由阿連臣揸旗。


漢堡新帥芬克未上任


雖然芬克仲未上任，但一班球員好似射手柏歷同隊長韋斯達文都對佢有讚無彈，加上今場有中場伊利斯域停賽4場後復出，前車路士中堅文切尼又傷愈候命，配合被傳媒吹捧有力做德國大國腳嘅林志堅喺右路發難，呢場要攞1分應唔算過分啫？


弗賴堡多人踢太公波


對家弗賴堡今季明顯冇上季咁Sharp醒，幸聯賽主場2連勝威力猶在，但要佢哋今晚攞晒3分就有一定難度，事關喺啱啱嘅國際賽期，前鋒柏比斯施斯、贊迪錫、中場普斯拿、後衞穆迪薩同門將奧利華包文都要踢「太公波」，損耗唔少體力，當中穆迪薩仲喺代表波斯尼亞對法國一役被踢斷蹠骨，今仗陪埋瑞士後衞費拉迪缺陣，對住漢堡根本冇十足勝算。睇番往績，弗賴堡近年主場對漢堡都係和波居多，今晚再開唔奇！


弗賴堡主場鬥漢堡多平手


日期 戰果

10/12/04 弗賴堡 1:0 漢堡

09/08/09 弗賴堡 1:1 漢堡

05/04/02 弗賴堡 1:1 漢堡

日期 戰果

04/05/15 弗賴堡 0:0 漢堡

02/05/04 弗賴堡 4:3 漢堡

01/04/07 弗賴堡 0:0 漢堡