畢爾包轟炸奧沙辛拿

猪拉多纳

17/10/2011
文： 走肖

世界變得瘋狂，癲佬都有擁躉，政治上如是，足球場如是。畢爾包今晚喺西甲主場對奧沙辛拿，有機會再開W，事關畢爾包士氣返晒嚟，「空中霸王」洛蘭迪上輪聯賽打破入球荒後，公開力撐被形容為「瘋子」嘅新教練比爾沙，仲話更衣室氣氛冇得彈，奧沙辛拿對賽輸蝕有難。




（開賽時間：周二凌晨3:00）




今晚西甲獨腳戲香港冇直播，唔知搞乜，但冇得睇，唔代表買唔過。畢爾包今季要兼顧歐霸盃，開季9場得3勝3和3負，曾帶領智利躋身南非世盃16強嘅新教練比爾沙，當然成為箭靶，不過傳媒同球迷點睇，未必作得實，國際賽前梅開二度打破個人連續5場入球荒嘅洛蘭迪就話，「瘋子戰術」啱晒畢爾包發揮。


比爾沙「瘋子戰術」使得


根據洛蘭迪所講，比爾沙嘅臨場戰術、操練內容同領軍風格，佢都覺得冇得頂，而且好享受現時隊波嘅打法，仲話家陣畢爾包更衣室團結到暈，認為比爾沙嘅感染力可以帶領隊友愈踢愈好。既然洛蘭迪講到咁堅，畢爾包又連環打沉聖日耳門同皇家蘇斯達，撻番着贏多鋪唔奇。


奧沙辛拿星散搶分乏力


對家方面，奧沙辛拿開季前清洗前鋒艾蘭達同彭迪安尼，中場卡梅拿斯同左閘蒙利爾又分別轉投維拉利爾同馬拉加，剩低幾多斤両，唔使用秤都估到，今季奧沙辛拿喺聯賽得1勝4和1負，證明冇乜搶分能力，而且近4次作客畢爾包全敗，睇落唔似惡得出，一於博洛蘭迪發威入波幫畢爾包開1.72倍主W。