曼城速決維拉利爾

猪拉多纳

18/10/2011
文： 法比加輝

歐聯「死亡A組」續演好戲，今輪有曼城主場對維拉利爾。「潛艇」今夏賣走中場大腦辛迪卡索拉可謂影響深遠，開季成績慘淡，尤其在歐聯碰上強敵即相形見絀，首兩戰均在開賽初段被對手攻到慌失失，反映「潛艇」在歐聯唔多夠班。加輝認為決心要在歐聯開齋嘅曼城可如願以償，建議捧「半場主勝」。




（有線61及201台周三凌晨2時45分直播）


潛艇態沉早段例失


維拉利爾今季成績差劣，而且亦未有好轉迹象，十一場賽事只係贏得兩場，球隊明顯存在問題。加輝認為「潛艇」倒退主因係賣走靈魂人物辛迪卡索拉，令球隊中前場活力大減之餘，最關鍵係缺乏具突破力人物，畢竟保查華利路只係擅長派牌，而約拿芬迪根斯文及靴蘭佩雷斯又唔夠級數，尼爾馬則長期受傷，難免令前線嘅基奧斯比羅斯孤掌難鳴，而馬高魯賓及安祖盧比斯亦續因傷缺陣。




維拉利爾在首兩場分組賽先後淨吞拜仁慕尼黑及拿玻里兩蛋，最值得參考係兩場比賽都係開波未夠十五分鐘已告失守，所以今場若睇好曼城嘅話，個人認為大可捧「半場主勝」。




曼城搏完先諗打吡




曼城今季戰績穩步上揚，聯賽七勝一和暫居英超榜首，而近兩戰都轟入四球，球員狀態「托弗」。事實上泰維斯嘅拒戰事件，某程度上對球會係因禍得福，事關呢單嘢畀領隊文仙尼一個機會去嚴治軍紀，泰維斯、迪斯高兩大射手被雪下，其他球員因而知驚踢出高水準，就連「腦殘」巴洛迪利都變番乖仔，近期踢出加盟以來代表作。

至於其餘球員亦搏命去保住正選位置，所以曼城士氣正盛，加上前兩場歐聯都未贏過，主場面對「死亡A組」最弱對手，實在冇失分空間，加輝認為就算有曼市打吡後顧都毋須擔心，始終歐聯搶分先係當前最重要任務。