黑山後衞幫朗尼求情

猪拉多纳

18/10/2011


朗尼獲黑山後衞迪素杜域力撐！英格蘭射手朗尼於歐國盃外圍賽蓄意踢跌黑山守將迪素杜域領紅，結果被罰於下年歐國盃停賽三場，受害人迪素杜域不但冇怪朗尼，仲話判決過嚴，若然對方上訴會幫口喎，真係好人！




朗尼怒踢迪素杜域被逐搞到一身蟻，迪素杜域受訪時話畀佢踢完賽後仲赤赤痛，但強調冇怪對方：「朗尼好快知道自己唔啱，如果佢真係上訴，我一定會現身幫口。」迪素杜域仲話享受同朗尼交手，希望下年於歐國盃再切磋喎。




據英國《每日郵報》報道，朗尼決心推翻歐洲足協停賽令，計劃親身去瑞士提出上訴，希望可以減刑。曼聯主帥費格遜就透露朗尼心情好差：「佢知道停三場後完全崩潰，所以對利物浦叫佢先踢後備，英格蘭隨時喺分組賽出局，佢分分鐘缺席整個大賽。」


英７歲童學朗尼踢人


另外，英國一名七歲小童盧卡斯見到朗尼踢人，竟然有樣學樣於練習中踢跌隊友，結果畀球隊開除，呢次朗尼真係教壞細路喇！