列強第3輪搏盡搶先機

猪拉多纳

18/10/2011
文： 黃興桂

十月歐聯只得一輪分組賽，不過嚟到第三輪，各路強隊好似曼聯、巴塞、車仔、皇馬咁都唔會鬆懈，務求盡快取得足夠分數，尤其係第三、第四輪對賽球隊相同，只係主場同作客互調，如果今輪失咗先機嘅話，下輪會更加難踢，所以Peter預計今明兩晚歐聯爆冷嘅空間會減少。


費格遜「雙紅會」留力明智


上周賽事嘅焦點，當然放喺「雙紅會」利物浦對曼聯身上，曼聯領隊費格遜可以話係老謀深算，佢竟然喺呢場大賽，將朗尼、查維亞靴南迪斯及拿尼等主將放喺後備席上，並利用朴智星、費查及菲爾鍾斯等防守力強嘅球員，令球迷始料不及。




費格遜咁大膽，主要原因係佢認為球隊仲有優勢，而且佢對旗下所有球員都有信心，故上半場刻意主守，留待下半場先同對手搏槌，結果曼聯順利取得一分，球迷及捧場客可能失望，但費爵爺相信已收貨，畢竟聯賽係長途戰，最重要係季尾攞到冠軍，眼前嘅失分根本唔太重要。




費格遜洞悉形勢，而且高瞻遠矚，視野比別人廣闊，只有莫連奴、哥迪奧拿等統帥，先同佢屬於同一級數，睇佢哋嘅球隊比賽，往往可以喺良帥身上學到嘢，確實係賞心樂事。