馬賽死火搞唔掂兵工廠

猪拉多纳

19/10/2011
文： 亨格比利

睇住阿仙奴喺周日晚砌低新特蘭，浪接浪又到肉嘅攻勢確係有昔日影子，今晚兵工廠喺歐聯F組造訪法國馬賽，照計可以食住回勇之勢同對手抗衡，受讓平半下盤抵捧。




（有線61及201、中央5台周四凌晨2:45直播）


阿仙奴近5戰4勝


經歷災難性開季之後，阿仙奴近5戰4勝，上仗就憑尹佩斯梅開二度擊敗「黑貓」，呢位隊長日前澄清賣樓轉會只係傳聞，講明會繼續效忠兵工廠，加上首兩輪F組分組賽坐波監嘅領隊雲格亦會復出，有「教授」喺歐聯戰場揸旗，班球員踢落都定啲啦！




冇錯，兵工廠今仗有左閘基蘭基比斯因胃抽筋唔出得，不過主隊馬賽都唔好得去邊，計落有右閘洛芬尼停賽、左閘查奧爾倦勤，防中麥比亞又養緊傷，縱使佢哋喺F組兩戰全勝，但佢哋新季法甲10戰只係贏過1場，最弊係前鋒佐敦阿休要坐波監，基格納亦只係傷愈冇耐，前線死晒火，主場出擊唔係高兵工廠好多o架喳。