洪禮賢講馬:卡加大師新強勁明旺桂花飄香

猪拉多纳

　　今晚全泥宴，雖然夜戰，向來唔係冇得追，經常見喺直路一「浸浸」冚上，且看今期模式係咪一樣。


　　另外，全泥宴無可避免係會爆，呢期又唔知有幾多無厘頭嘅冷門出現，而暫時為止，季內泥地6匹大熱贏過兩隻，唔算利熱，又睇吓今晚係咪繼續吹冷風。

　　　重心場次：第4場 第四班（60-40分）1650米

　　「卡加大師」初出跑法老襯，前段唔夠主動，搞到直路曾困窘，尚可衝入第五名則收貨有餘。今仗轉泥地，希望早段積極爭位，如交得出上季中同程輸畀「善戰」水準，有權贏。

　　「明旺」一再貼過，去到上賽終有追勢，反映進度已起，而按前仗初跑同程表現（塞車後仍肯追），泥地一定勝任。

　　「新強勁」論態，同場最四正，係驚7歲馬體力唔知保唔保持到。「稻庭烏冬」及「彩虹幻影」邊線之選。「勁快」連仗已感失望。「桂花飄香」因8月中曾缺課，影響了進度，跑兩場冇影好正常，但復課明顯爽番，忽然轉場及用小將，大冷在此。

　　第1場 第五班（40-10分）1650米

　　「冰火」跑完1場即轉場，手法急進，而話晒上季4場此程得2W1P，級數贏晒，如肯搏，應有收穫。

　　「大紅人」操得但跑唔番，不過，今仗加程，畀埋最後機會呢匹腳患馬。「博利好」初出表現略失望。「華劍寶」同場如冇馬走，有機會又得佢領放，一哩其實更啱發揮，唯有寄望勝後例冇P往績嘅數據爆攤！

　　「駿馬飛騰」泥地與草地實力或有好大距離，因轉場關係，睇埋今場。「兵奇臨」向來初出例衰，惟上場冇形勢仍跑得好，改戰合適路程，評級自然提高。

　　第2場 第四班（60-40分）1200米

　　「童夢」及「寶貝」，均為同程好手，如根據初出表現，前駒成績比預期好，做膽。

　　「自家威」泥地此程實力值三班中上級，落班就算唔夠態，仍有威脅。「上海先鋒」8月中操操停停，不過，之後個多月工序好番晒，既然對上兩季初出均有殿軍，弱馬搏頭幾仗好正路。「夢幻魔術」轉場的確有疑問，因上季曾經跑到不良於行。

　　第3場 第四班（60-40分）1200米

　　「聚豪精英」分數可能冇so，但當打及路程係強項，可能蝦到一批初出實力馬。「飛躍之駒」試兩大閘先跑，首閘贏得易，而第2個閘被拋甩，只因同試係高班快馬，唔使介意，睇程序做得妥當，係要睇負重能力啫。

　　「風陵渡」操練流程與前駒差唔多，又係操到夠至出賽，又睇吓轉倉首戰係咪展示到比前強大嘅能力。「金獅駿將」狀態冇低落，上場大敗純因取位曳！「皆大歡喜」總覺早課比較「立」。

　　第5場 第三班（85-60分）1200米

　　「聖迪達」此程好少冇P，亦經常可打叠上名，加上，今仗負磅略減，對爭勝幫助大。「新力飛」試大閘時仍覺未銳，及至埋門落草地，走過快捷而輕易，進展良多。

　　「銘記心頭」以此馬房手法，賽前工夫算好認真，如果有泥地，以目前水準唔難爭一席。「搏得分」剛賽尾段騎唔到幾多步，因常處塞車狀態。至於近況，經3仗實戰磨鍊，經已收妥身形，如果今場跑法似季前試閘早早霸喺前列，初戰泥地亦有權跑得好。「科研精英」初出谷草1000米大半程跟好位，直路成隻企喺度，輸到唔似真！突然轉場，唔敢批死。

　　第6場 第三班（80-60分）1650米

　　「非常好」及「勁飛馳」最有好感，一對馬靠後追，今場形勢有利，當然，嚴格來說，前駒或尚欠跑頭，後駒則驚重磅及大外檔。

　　「齊喝采」評分比上季同期此程取WP時仲要低，有危險性。「漸信良駒」及「歐洲駿馬」近況唔錯，路程性能則比不上前幾駒，邊線分子。「成就美麗」唔係一心等落班，今場應該有本錢一爭。「喜威寶」泥地具穩定性，卻難贏。

　　第7場 第三班（80-60分）1200米

　　「八發八中」和「駔驍駿駒」啱啱贏完同程，各有各犀利，前駒又一次大勝，今仗升班負磅大減，唔應該下風。後駒暑後冇以前咁促，能改用後上跑法贏馬，轉型成功，威力可三級跳。

　　「天賜福星」係要睇12檔會唔會多耗力，以及放快咗。「龍城動力」上仗負重、初跑此程、沿途外叠，居然唔斷，今賽條件略比前可取，或有P。「添福駿驥」以上季入圍賽績計算，三班唔會冇得贏，賽前操練對辦，係睇吓初出跑得出幾多成。

　　第8場 第一班（105-80分）1200米

　　「讚惑」剛剛仲跑緊group，轉到一班泥地完全唔同級數，而上賽前狀態唔起眼，在發揮普通下仍湧得勁，只要有泥地，必有三甲。「旅英駿駒」及「大把在手」，實力不及前駒，可取在路程性能。

　　「聖法理」戴眼罩試大閘，省住大勝，略有挑剔。反而，同日又係試大閘嘅「好好彩」，贏起上嚟姿態利落得多。