水原藍翼強攻艾薩德

猪拉多纳

19/10/2011
文： 走肖

亞冠盃4強首回合今晚爆發，南韓水原藍翼喺主場對卡塔爾艾薩德，需要捍衞「亞洲最強」招牌。根據國際足球歷史及統計學會最新球會排名，水原榮登亞洲No.1，但佢哋剛啱失落韓足盃，捲入假波案嘅隊長崔成國又被逐出韓國球壇，唔踩油開1.97倍「讓主」點得？




（now671台周三晚6:30直播）




根據IFFHS排名，亞洲球會前3名分別係水原藍翼、全北汽車同FC首爾，而且對上兩屆亞冠盃冠軍分別係浦項制鐵同城南一和，可想而知，韓職球會近年表現確係醒。可惜，假波案令到韓職重創，最近懲戒委員會再開會，決定將涉案47個球員永久逐出韓國球壇，任何有關足球嘅工作都唔准掂，藉以顯示打假決心！


亞冠盃主場未輸過


呢批球員中以水原隊長崔成國最大名氣，作為韓職最多擁躉球會，呢件事令水原贊助商三星勁尷尬，點知日前韓足盃決賽，水原又喺決賽以0:1不敵城南衰上加衰。不過咁，今屆水原喺亞冠盃主場有3勝2和，3次贏波坐底淨勝2球，陣中又有馬其頓射手列斯迪、烏茲別克前鋒格恩里克同南韓翼鋒廉基勳壓陣，有條件反彈。




對家艾薩德現時係卡塔爾聯賽榜首球隊，又有星級球員包括射手尼安、前鋒卡達基達同中堅李正秀孭飛，但佢哋上一圈淘汰沙巴罕，某程度係因為對方首回合用唔符合資格球員上陣先由輸變贏僥倖出線，何況艾薩德最熟亞洲賽事嘅箭頭李安度蒙迪拉仲有傷，作客出事唔奇。