鳥棲爭升班搵富山做炮灰

猪拉多纳

19/10/2011
文： 力奇

唔經唔覺，日乙剩番9輪，今季爭升班嘅形勢比過去激烈，到依家仲有5隊爭緊3個日職席位，排第2嘅鳥棲砂岩唔想衰收尾，今日作客一定要o趙富山勝利，1.6倍客W博得過。




（開賽時間：周三晚6:00）


推販賣機計劃募集強化費


鳥棲上季由前南韓國腳尹晶煥揸旗之後，進步愈嚟愈大，嗰套兩邊拉開，小組入楔戰術愈用愈熟，近期仲取得聯賽10戰不敗。球會上下都憧憬可以升班，呢兩日仲推出一個「砂岩支援自動販賣機」計劃，邀請啲商企放置印有佢哋隻吉祥物嘜頭嘅飲品販賣機，抽取部分收益會作隊波嘅「強化費」，即係用嚟做訓練、買人嘅用途，明顯係為升班做長遠準備。




但鳥棲家陣落後榜首FC東京7分，又同札幌、德島及千葉只有0至3分差距，甩唔開呢幾個對手，好易臨尾香，況且打完今日場波，佢哋就要接連出戰FC東京、千葉巿原兩大競爭對手，如果今日對富山都攞唔足3分，同自殺冇乜分別，鬥志一定冇得頂。




無疑從往績上嚟講，島棲呢兩年3次作客富山得2和1負，一啲優勢都冇，不過鳥棲今時唔同往日，呢季係佢哋創會12年嚟最有機會衝上日職嘅一次，而且富山又真係幫唔落，上仗主場都輸埋畀北九州，對住如狼似虎嘅鳥棲幾難甩到身。