南球盃16強次回合 葛度爾古斯炸冧秘大

猪拉多纳

20/10/2011
文： 走肖

南美球會盃16強次回合，聽朝有好嘢！秘魯體育大學喺主場對阿甲奇兵葛度爾古斯，即使「秘大」今場只係平手盤唔使讓波，都一樣捧唔過。人面對逆境，好多時會發揮出意想不到小宇宙，好似葛度爾古斯隊長奧美度就話，佢哋要搭長途巴士加坐飛機至去到秘魯比賽，搞咁多嘢，今場話會搏命贏波晉級補數，仲視今戰為歷史任務，鬥心爆棚，抵捧。（開賽時間：周五早上8:45）


近12戰得1場食白果


計埋首回合踢成1:1，葛度爾古斯近12場得1場冇波入，火力非常有保證，難怪佢哋一直可以站穩喺阿甲中上游位置。而且葛度爾古斯今年首次出席更高一級嘅南美自由盃，雖然最終分組賽包尾出局，但其實都有2勝1和3負，表現唔曳，出局都相當唔夠運。葛軍隊長奧美度更加話，依家雖然要轉戰南球盃，但佢哋一樣視搶走呢隻盃為開創球會歷史嘅重要任務，暫時目標係走得愈遠愈好，今鋪即使係山長水遠去到秘魯比賽，都絕對會搏老命搶W。




事實上，葛度爾古斯射手魯賓拉美尼斯今季已經有7個聯賽入球，有佢幫手唔憂冇波入。咪忘記對家秘魯體育大學條防線勁唔掂，近8場得2次保持清白，大軍又主要以秘魯球員做骨幹，所謂外援都係來自阿根廷，當中嘅中場柏保路維迪，曾經要去美職聯嘅FC多倫多搵食，質素有限，要晉級唔容易。