摩納哥殘陣難讓杜亞斯

猪拉多纳

21/10/2011
文： 力奇

前法甲冠軍摩納哥今季淪落法乙，可惜低處未算低，上輪輸畀甘岡後仲跌落包尾位置，深受降班威脅。佢哋位新教頭馬高施蒙尼領軍5戰僅1勝，董事局似乎所託非人，今晚主場出戰中游分子杜亞斯，喺2大主力停賽兼眾多傷兵下，仲點讓波？1.7倍「讓客」抵捧。（開賽時間：周六凌晨2:00）


教頭自踩質素曳損士氣


摩納哥今夏大換血，搵嚟包括古利、華希路亞同希士達等老將加盟，可惜班波融合得麻麻，最慘又飽受傷兵問題困擾，持續不振，結果踢到9月上旬聯賽6戰不勝後，就宣布辭退教練班尼特，改為搵球隊昔日名將意大利射手馬高施蒙尼領軍。咪話力奇潑冷水，想靠冇領軍經驗嘅施蒙尼領軍逃出生天，根本唔易。事實上，球隊喺佢接手後5戰只得1勝2和2負，最慘係佢仲公開話班波實力只值咁嘅成績，試問陣內士氣點會好？




講番場波，摩納哥有門將卡拉素同後防主力梅拉托利停賽，老將中場古利、杜蒙特、守將彼德漢臣同門將查拔又話有傷唔踢得，要殘陣出擊。對手杜亞斯目前排第9，表現不過不失，射手貝安高同迪亞高洛迪古斯今季各入4球，把握力唔曳。佢哋11場聯賽只得1場冇波入，火力有番咁上下，對住摩納哥偷雞贏埋都得。