皇馬先係正貨

猪拉多纳

22/10/2011
文： 法比加輝

今輪西甲上演重磅大戰，兩支輪流燒錢嘅富豪球會正面交鋒，馬拉加主場對皇家馬德里。雖然馬拉加今季增兵後成績躍進，但老實講其主力大多屬於過氣球星，對弱旅綽綽有餘，但一遇前列分子就原形畢露，上場對新勢力利雲特就淨吞三蛋。再者，「銀河艦隊」近期實在太順，加輝都唔敢同佢哋作對，今場建議熱捧客W，再冷敲1:2、1:3波膽。（now 632及660周日凌晨2時直播）




馬拉加今夏瘋狂掃貨下，已由護級常客成為前列部隊，現時以十三分排第六，絕對唔失禮。不過馬拉加想爭奪歐聯資格，又或者進一步威脅「西甲雙雄」嘅話，睇怕一月都要再燒啲錢至有價講，事關除辛迪卡索拉當打外，馬拉加其餘主力都過晒氣，好似雲尼斯達萊、祖亞昆、迪米捷利斯、杜拿蘭及馬菲臣等早就高峰已過，整體實力難與「艦隊」相提並論。


馬拉加遇強現形


故此，馬拉加今季面對如CF格蘭納達等弱旅綽綽有餘，但一碰上前列嘅西維爾及利雲特就冇晒符，下半場體力更明顯不及對手。馬拉加核心巴迪斯達有傷在身，今場上陣成疑，而最令人擔心係正選門神韋利卡巴尼路要停賽，事關後備門將魯賓艾雲上場後備入替表現慌失失，更犯下大錯累失波，今回面對「銀河艦隊」，隨時再因為受唔住壓力犯錯。




皇馬近期順風順水，周中歐聯大勝里昂後已取得五連勝，合共射入廿一球，平均一場入四球以上。不過最令人欣賞係「艦隊」近期逐漸擺脫依賴個人技術嘅踢法，就連C朗拿度都放棄獨食轉做助攻手，令莫連奴麾下嘅皇馬愈來愈具侵略性。至於傷兵方面亦唔算嚴重，只有艾比奧爾、紐尼沙軒、卡維奴及狄亞拉因傷缺陣，大家若嫌1.4倍客勝乏味嘅話，加輝建議大家玩即場投X，等好分啲先押注，另外波膽1:2及1:3亦係心水之選。