喜鵲唔再亂衝有睇頭

猪拉多纳

22/10/2011
文： 江忠德

英超踢咗8輪剩番3隊波未輸過，其中有聽晚對撼嘅曼巿雙雄就一啲都唔奇，估唔到連紐卡素都有份，就令好多球迷跌晒眼鏡。「喜鵲」今季一改以往橫衝直撞嘅風格，穩紮穩打帶嚟驚喜，韋根今晚都好難阻頭阻勢！




聖占士公園一向被視為英格蘭最激情嘅球場，球迷瘋狂吶喊助威，球員喺球場上好容易進入忘我境界，但係以往有前冇後入埋唔夠輸，到頭來一事無成。今季紐卡素一反常態，搞好防守伺機而動，雖然依家係6強當中入波最少，同樣亦係失波最少，對住近5場聯賽連敗嘅韋根，可以繼續穩步上揚！


曼市打吡考起費Sir


至於禮拜日晚重頭戲曼巿打吡戰，關鍵人物係曼城領隊文仙尼，佢一向畀人感覺係比較細膽，遇到強敵就進退失據，臨場調動都亂晒龍。幸好呢種情況喺今季有所改善，尤其係經歷歐聯磨練，文仙尼同球員應付硬仗嘅心都冇咁怯，呢場作客奧脫福幾令人期待。




曼聯近期氣勢明顯弱咗，費爵爺靠班生牯仔喺季初威過一排，但踢多幾輪之後，開放式打法同防守漏洞嘅毛病逐漸暴露出嚟，對住可以砌兩隊正選嘅曼城，費格遜嘅壓力一定唔細。