那些年，曼城都威過……

猪拉多纳

23/10/2011


曼城成立一百三十一年以來，好少有今季咁威，球隊對上一個黃金時期要追溯到上世紀六十年代尾，最經典必數1967/68年度球季，當時又係曼市雙雄之爭，曼城以兩分之差力壓曼聯，奪得當年仍屬頂級聯賽嘅英甲冠軍，相隔近半世紀，再現曼市雙雄互相輝映局面。


歷史上僅兩度封王


曼城史上只曾兩次奪得頂級聯賽冠軍，分別為1936/37年度及1967/68年度，其中以上世紀六十年代最令人津津樂道。曼城1963年降班，但五年後卻登上頂級聯賽盟主寶座。該季曼市雙雄爭崩頭，聯賽兩次對決，由作客一方勝出，戰至最後一輪聯賽，曼城戲劇性反超前曼聯，翌年曼城奪得足總盃冠軍。曼城上季相隔四十二年後，再捧足總盃，今季能否趁機攞埋聯賽冠軍，大家拭目以待。




至於講到曼市打吡，兩隊喺1969/70年度球季，包括聯賽及盃賽，一季內曾五次交手，屬歷季之冠，當時曼城取得三勝一和一負，包括英聯盃四強兩回合合計以四比三淘汰曼聯，曼城最終亦奪得冠軍。