利華史浩克大有睇頭

猪拉多纳

23/10/2011
文： 蘇斯黑柴

德甲頭場演好戲，利華古遜主場惡鬥史浩克04，雙方近期攻強守弱，兩軍主力攻擊手舒賀爾尼同亨特拉爾都着晒火，加上雙方剛於歐洲賽事取得漂亮勝仗，氣勢如虹，今晚實行大駁火，投X首選1.65倍大盤。




（有線61及64台周日晚9時30分直播）


托柏克梅斯達鬥甩漏


利華古遜近季恰住史浩克，近五季十次聯賽碰頭取得七勝二和一負佳績，不過球隊今季演出好唔穩定，尤其防線甩漏甚多，年輕中堅奧馬托柏克係新帥杜特由弗賴堡帶嚟嘅愛將，不過呢位天才球員經過長期受傷後演出冇出道時咁穩，好明顯係計時炸彈，佢哋近八場正式賽事共失十四球，對一支強隊嚟講絕對唔合格，今仗仲有右閘卡斯特羅停賽，防線實力進一步削弱，不過佢哋前線近期表現出色，新加盟嘅舒賀爾尼無論喺球會同國家隊都有貨交，加上啱啱喺歐聯反勝華倫西亞令全隊信心大增，今晚主場出擊必然搶攻求勝。


希迪布蘭未弗難救急


史浩克上輪聯賽主場輸畀凱沙羅頓，演出令人失望，不過啱啱喺歐霸盃作客大炒塞浦路斯AEK拉亞拿卡五蛋，令球隊重拾自信，箭頭亨特拉爾該役梅開二度，今季喺各項賽事合共轟入十八球，狀態巔峰，加上星級鋒將魯爾喺歐霸盃只踢半場，留晒力今晚搏殺。




不過史浩克防線亦堪憂，門將費文上仗被逐兼受傷，雖然會方臨急簽下前國門希迪布蘭，但狀態未足今場唔會擔正，要用卅五歲老門將舒奧比應急，中堅梅斯達甩漏多同樣係計時炸彈，防線同利華古遜一樣隱憂多多，雙方同樣攻優於守，今仗入波唔會少。