上次谷草執番2W 姚本輝繼續起孖

猪拉多纳

　　姚本輝馬房剛在谷草日賽起孖，但原來近月此廐谷草成績認真麻麻，查對上1匹谷草頭馬已數到21/9「財駿福星」，即係話未贏啱啱兩W之前，谷草已超過1個月守齋期。

　　睇過今期此廐出馬陣容，數量唔多，4駒啫！順序為「中國神農」、「超晒班」、「寶成智星」及「正黃旗」，有冇機會孖開就孖？唔係冇可能，因為，至少有兩駒條件唔差。

　　筆者所指係「超晒班」和「正黃旗」，前駒降番落四班，唔使再同一批三班馬鬥，形勢弱變強，本身跑開有狀態支持，隻馬又夠快，而7檔唔係太差，有權一放到底。

　　而「正黃旗」，如果今晚場地受天雨影響，佢會係受惠者之一，所以，地慢一定睇高啲。同時，季內跑兩場，成績穩步上揚，相信嚟到季內第3仗，已經跑起狀態。雖然，今場未必有快步速，有可能形勢唔就佢，但剛賽前前中段亦唔係特別快，佢一樣有衝勢，所以，今場早段唔係特別慢，其實佢已經會應付到，等到入直路爆起上嚟，佢後勁唔係人咁品。

Jack