AC讓球勝帕心口捧場

猪拉多纳

26/10/2011
文： 巨高

意甲周中開快車，衞冕盟主AC米蘭主場迎戰帕爾馬。最近AC米蘭大紅人一定係奇雲保定，呢位加納國腳周日對萊切時大演帽子戲法，協助球隊奇迹反敗為勝4比3。而上星期歐聯對巴迪佢又有入波，腳風順到你唔信。今晚奇雲保定必然係正選上陣，淨係個勢都嚇窒帕爾馬，「讓球主勝」可望順利開出。(now 633周四凌晨2時45分直播)


入波慶祝動作多花臣


所謂人夾人緣，奇雲保定以前踢哈化柏林、熱刺及樸茨茅夫，表現只係中規中矩。點知加盟AC米蘭之後佢就好似開咗竅咁大放異彩，成為米蘭球迷新寵兒。




奇雲保定唔單止好波，最過癮係佢有一鋪表演癮，上季意甲冠軍慶祝大會扮米高積遜，已令球迷拍爛手掌。而季初意超盃入球後又扮打功夫，更令中國球迷對佢另眼相看。今晚聖西路球場作賽，奇雲保定一定會好好享受呢個米蘭市大舞台，盡量表現自己以打動觀眾心靈。只要球迷掌聲愈響亮，奇雲保定就愈精神。牡丹雖好都要有綠葉扶持，幾位進攻手包括卡斯辛奴及伊巴謙莫域等人都冇傷冇病，今場當可竭盡所能，成就奇雲保定呢位新舞台王者。


對賽往績帕爾馬輸條街


AC米蘭今季個頭開得唔靚，目前已落後榜首烏甸尼斯4分，咁辛苦先至搵到條勝利方程式，當然唔想畀佢停，主場出擊呢3分志在必得。




對手帕爾馬最近6次作客AC米蘭錄得1和5負劣績，有咁差嘅往績支持，即使受讓都係咁話，巨高認為佢哋再輸一場絕對唔奇，AC「讓球主勝」捧得過。