急流讓波有危「機」

猪拉多纳

27/10/2011
文： 朱楓

踢波有時都講天時、地利同人和，不過科羅拉多急流今屆想衞冕美職季後賽就唔多樂觀，事關佢哋聽朝喺外卡賽主場對哥倫布機員，有兩大奪標功臣缺陣，已失人和，尋日練波又受風雪影響，連個天都唔幫，聽朝對住大變陣力爭出線嘅機員試問點讓波，朱楓會捧1.85倍「讓球客勝」！（開賽時間：周五早上10:00）




上屆首奪季後賽冠軍嘅急流，今季憑最後4場常規賽保持不敗，再次殺入季後賽，並喺新增嘅外卡賽同機員合演上屆東岸4強翻版戰，雙方兩隊兩回合計打成2:2，最終急流射贏12碼晉級。


暴風雪侵襲難練波


剛坐完波監嘅急流後衞德魯摩亞，賽前就話聽朝一定要把握地利再次擊敗對手，可惜上屆東岸4強首回合主場對機員一箭定江山嘅隊長中場馬斯杜安尼因為腦震盪，今仗復出機會極微；上屆季後賽決賽最有價值球員卡斯，更因傷只能作壁上觀。最慘係科羅拉多近日氣溫急劇下降，當地國家氣象局更發出暴風雪警告，搞到急流尋日要縮短練波時間，話冇影響就呃你。


機員大變陣求出線


機員日前喺常規賽煞科戰作客以2:3不敵芝加哥火燄不特止，更有中場艾克普領紅坐波監，但教練華斯查驚都未驚過，賽前仲話聽朝會搵今季傷多過踢嘅中場奧洛基擔正，新人巴爾贊亦會取代奇雲賓斯打正選，仲話會搵因膝傷已有3個月冇比賽嘅泰查尼取代艾克普，一副成竹在胸格局，要喺法定時間保持不敗睇落唔難！