車路士強爆兵工廠

猪拉多纳

29/10/2011
文： 樂比堅尼

今晚英超上演兩場「萬聖節」特別檔期大戰，頭場愛華頓主場對曼聯（有線201及301台周六晚7時直播），「紅魔鬼」派「糖」，睇完半場可轉台睇倫敦打吡，車路士主場對阿仙奴，「南瓜車」誓破「兵工廠」！（有線200及300台周六晚7時45分直播）




車路士以往一直畀阿仙奴食住，但自從阿布拉莫域入主後，形勢完全逆轉，近年來車路士對阿仙奴贏多輸少，連盃賽近六次交手贏咗五次，以阿仙奴今季嘅表現，想翻身都幾難！




車路士近兩仗法定時間未能贏波，先喺聯賽以○比一不敵昆士柏流浪，周中英聯盃加時先贏愛華頓二比一，表面睇近況麻麻，但唔好忘記車仔對QPR係輸喺球證手上，即使九人應戰仍有贏波機會，而對愛華頓只係派後備落場，大部分時間踢少一人仍擊敗愛華頓正規軍絕對值得一讚。


費托回魂又多幫手


事實上，車路士目前嘅狀態拍得住前季封王嘅時候，前鋒費蘭度托利斯及史杜列治腳風甚順，加上桑馬達負責鋪橋搭路，車仔嘅進攻板斧甚多，反觀阿仙奴進攻太集中喺尹佩斯身上，只要凍結佢嘅話，便可成功堵塞阿仙奴嘅攻勢。


阿仙奴作客變豆腐


其實阿仙奴最大隱憂都係來自防線，中路嘅梅迪薩卡固然不穩，華美倫傷愈復出狀態亦未足，加上右閘沙格拿有排抖，無論搵佐羅或哥斯尼客串踢右閘，都難予人信心，阿仙奴今季對攻力稍強嘅球隊，如熱刺、利物浦及曼聯全部輸波，四場聯賽作客成績為一和三負，足足失咗十四球，呢個咁恐怖嘅戰績，去到史丹福橋球場，睇怕都凶多吉少！


近十次聯賽交手成績


27/12/10 阿 3:1 車

03/10/10 車 2:0 阿

07/02/10 車 2:0 阿

29/11/09 阿 0:3 車

10/05/09 阿 1:4 車

30/11/08 車 1:2 阿

23/03/08 車 2:1 阿

16/12/07 阿 1:0 車

06/05/07 阿 1:1 車

10/12/06 車 1:1 阿