鶴臣再領西布朗謀利

猪拉多纳

29/10/2011
文： 張志德

曼城終於發揮金錢足球威力，喺英超跑出，但細鬼認為靠金錢換取成績，意義實在不大。反而由兄弟班，經過一輪努力奮鬥踢出佳作，更值得令人鼓掌。西布朗人腳冇得同大球會比，但勝在夠拚搏，領隊鶴臣同紅軍有仇，一班球員更加會落力為主帥踢爭氣波，西布朗今晚主場鬥利物浦，受讓平半高水博下盤。




（有線300及200台周日凌晨零時30分直播）


上季主場贏2:1復仇


鶴臣屬於有料之人，上季中臨危受命執教西布朗，即帶領球隊走出困境，包括喺主場贏利物浦二比一，報番被對方炒魷之仇，亦反映佢對紅軍實力瞭若指掌，利物浦好難佔到甜頭。而且西布朗經過季初連番失利後，近期已經上晒力，近四場聯賽不敗。呢類細球會主要打道氣，依家愈踢愈順，即使對強隊亦冇有怕。




更何況利物浦近年冇晒勁旅本色，淨係睇佢哋今季冇歐洲賽負擔，都落後曼城十分，就知紅軍Big4招牌名存實亡。而且利物浦水準唔穩，可以話遇強愈強、遇弱愈弱，能夠贏阿仙奴、打和曼聯，但卻失分畀諾域治，所以唔好畀佢哋大名影響投X判斷。




本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。