拜仁入局快 半場奪堡

猪拉多纳

29/10/2011
文： 蘇斯黑柴

拜仁慕尼黑今季大翻身，目前三線作戰都強勢挺進，黑柴認為源於換帥成功，由樣樣做錯晒嘅尹戈爾換上樣樣做啱晒嘅軒歷基斯，球隊立即脫胎換骨，今晚德甲主場迎戰紐倫堡，可以由頭贏到尾。




（有線61及64台周六晚9時30分直播）




軒歷基斯無論經驗、功力甚至人品都贏晒尹戈爾，德高望重之餘又肯同球員打好關係，用人公道合理，適當輪換更係高招。拜仁啱啱喺德國盃用近乎B隊輕勝恩高斯達特，班副選球員可以保持興奮狀態，正選嗰班收到警惕之餘，亦得到充分休息，球隊氣氛極之融洽。


歐聯前例由頭贏到尾


拜仁下周中會喺歐聯主場對拿玻里，但軒歷基斯一向嘅留力方法十分正面，就係喺歐聯前嘅聯賽早早解決對手，過去三場歐聯分組賽之前，拜仁聯賽不但全勝，而且全部喺開賽十分鐘內已入波，上半場已奠定勝局，下半場自然可以輕鬆留力，今晚面對殘陣兵疲嘅紐倫堡，開出半全場「主主」機會高唱入雲。




當然，拜仁「主主」只得1.45倍分頭乏味，黑柴建議玩過關，慕遜加柏係今季德甲細盤王，主場對漢諾威一戰，雙方啱啱喺德國盃苦戰百二分鐘攰到爆，宜追1.72倍細盤；至於史浩克近期鋒線着火，面對有伊比斯域回勇嘅賀芬咸，捧1.78倍大盤。呢條三串一有4.4倍，係黑柴誠意推介。