AC重拾霸氣羅馬有難

猪拉多纳

29/10/2011
文： Mic少

同晚意甲另一大戰羅馬主場對AC米蘭，衞冕嘅AC自擺脫傷兵問題後，已重現冠軍霸氣，尤其係一眾中前場輪流爆發，成為意甲火力最強球隊。反觀羅馬少帥安歷基仍然「水土不服」，唔係AC教練阿里基對手，平手盤要AC米蘭。（now633周日凌晨零時直播）




AC開季脫腳主因係傷兵問題嚴重，但隨着伊巴謙莫域、羅賓奴、泰禾及麥薩斯傷愈，人腳漸見完整，而且兩位新兵洛斯連奴同阿古蘭尼已融入球隊，AC整體實力比上季有過之無不及。其中洛斯連奴上仗大演帽子戲法，加上早前同樣連中三元嘅奇雲保定，配合伊巴謙莫域同卡斯辛奴，AC攻擊瓣數非常多元化，勢令羅馬防不勝防。


安歷基教波功力未到家


安歷基嘅「西班牙化」改革，明顯唔適合羅馬，球隊表現患得患失，上仗對熱拿亞收起射手奧斯華度，為今場大戰留力，點知搞到輸波，可謂得不償失，反映安歷基領軍功力未到家。另門將史基倫堡承認語言不通，經常同隊友出現誤會，面對AC強大火力，更添隱憂。