升班封王凱沙羅頓最神奇

猪拉多纳

30/10/2011


踢完9周，能夠力壓皇馬、巴塞上榜首，利雲特已經締造咗一個神話，但想呢個神話有個完美結局？就要睇佢哋班老將，可唔可以成季都逃得過傷病困擾，狀態長期保持大勇喇！環顧歐洲頂級球壇，真正以冷門球隊身份成功問鼎冠軍，真係少之又少，98年嘅凱沙羅頓絕對係當中表表者。




凱沙羅頓當年奪標之所以令人印象深刻，皆因佢哋係由德乙重返德甲，新升班第1季即能以2分之微力壓衞冕冠軍拜仁慕尼黑奪標，締造歷史。不過利雲特依家係面對前所未有強大嘅皇馬同巴塞夾擊，好彩嘅話，佢哋可能好似02/03球季西甲嘅皇家蘇斯達一樣，鬥到最後一輪先失落冠軍，攞到亞軍。唔好彩的話，就可能好似08/09球季嘅德甲賀芬咸，帶足半季，最後受到射手伊比斯域重傷影響，虎頭蛇尾，僅以第7名過終點。


各界反應


利雲特奇迹人人關心，究竟球圈中人又點睇呢班波呢？




卡蘭卡（皇家馬德里助教）：




目前全西甲最好就係利雲特，佢哋一直踢出高水準嘅足球，得到嘅讚賞都係值得嘅。




高爾湯（艾美利亞前鋒）：

佢哋真係好出色，不過一切都只會係一個夢，而且好快會夢醒，我唔相信佢哋會攞到歐聯資格。

加列度（維拉利爾教練）：

利雲特係所有西甲球隊嘅典範，理應獲得各界尊重，我好欣賞佢哋嘅成績。