低級犯錯唔值得

猪拉多纳

　　有陣時睇跑馬，未必要有份落注先投入，真正喜歡賽馬嘅人，會深深感受到1場賽事嘅刺激性。正因為投入，如果見到啲礙眼鏡頭，真係嬲到震，可能一路睇一路唸三字經。

　　而早排寫過段稿，係關於巫斯義，事緣有次佢騎「天下寶」，喺末段最後幾步冇騎，賽後畀小組「哦」過，當時已經指出，如果喺終點前差一兩步唔去騎，無謂兼無意義，因壓線前或後嗰一步，唔係咁易判斷，與其有潛在犯險嘅可能性，點解唔做到盡善盡美。而巫斯義最近就因為「福譽」拉士唔騎，畀小組罰兩皮！數目唔係多，但希望有阻嚇性。

　　其實巫斯義唔只今季係咁，上季畀人鬧爆已有「閃耀小子」，騎到入直路冇耐，佢成個人企高身，真係好懷疑佢有冇咁快feel到隻馬冇餘力呀？！而該駒再出即勝，感覺上，係狠狠地摑咗佢一巴掌。

　　除非巫斯義老到體力唔夠，既然依家陣上仲係咁騎得，鞭騎推打，冇一瓣唔掂，點解要畀小小嘅污點影響佢自己形象，堂堂法國殿堂級高手，衰喺啲咁低級犯錯，絕對唔應該及唔值得！

馬會賽馬節目主持　洪禮賢